آئندہ ماہ اپریل کے تیسرے ہفتے کے دوران گندم اور آٹے کی قیمتوں میں بڑا اضافہ ہوگا۔ اس کی وجہ پنجاب حکومت کی متوقع طور پر سرکاری گوداموں سے گندم کی فراہمی کی بندش ہے۔ متعدد ذرائع کے مطابق بیس کلو کے تھیلے کی قیمت میں چالیس سے نوے روپے تک اضافہ ہو جائے گا۔ اگر حکومت نے گندم کی موجودہ امدادی قیمتوں پر نظرثانی نہ کی تو بیس کلو کے تھیلے کی قیمت میں چالیس روپے اضافہ ہوگا کیونکہ یکم سے پندرہ اپریل کے دوران عمومی طور پر سرکاری گوداموں سے گندم کا اجراء بند کر دیا جاتا ہے اور آٹے کی قیمتوں کا تعین اوپن مارکیٹ میں قیمتوں کے لحاظ سے ہوتا ہے۔ اس وقت پنجاب حکومت 465 روپے فی من کی شرح سے فلور ملوں کو گندم فراہم کر رہی ہے جبکہ کھلی مارکیٹ میں اس کا ریٹ 600سے 620روپے فی من کے درمیان ہے۔ حکومت کی طرف سے امدادی قیمت 510روپے فی من طے رہنے کے نتیجہ میں اوپن مارکیٹ میں اس کا ریٹ 530سے 550روپے کے درمیان رہنے کا امکان ظاہر کیا گیا ہے۔ اس صورت میں فلور ملوں کو ملنے والی گندم کا ریٹ 65سے 80روپے تک بڑھ جائے گا اور آٹے کی قیمت میں بھی اسی تناسب سے اضافہ ہوجائے گا۔