ابن جلال

اپوزیشن لیڈر چوہدری پرویز الٰہی عہدے سے مستعفی
طے شدہ مطالبات کے مطابق قائد حزب اختلاف بنا تھا لیکن اب لگتا ہے کہ حکومتی اتحاد سے علیحدہ ہونے والے مرکز میں اپوزیشن لیڈر کی کرسی پرنظریں جما رہے ہیں، پرویز الٰہی کی نجی ٹی وی چینل سے گفتگو
اسلام آباد۔۔۔۔۔۔قومی اسمبلی میں قائد حزب اختلاف چودھری پرویزالٰہی نے اپوزیشن لیڈر کی حیثیت سے اپنا استعفیٰ سپیکر قومی اسمبلی کو فیکس کر دیا ہے۔ مسلم لیگ ق پنجاب کے صدر چودھری پرویزالٰہی نے ایک نجی ٹی وی سے گفتگو کے دوران اپنے استعفیٰ کی وجوہات بتاتے ہوئے کہا کہ وہ طے شدہ روایات کے مطابق اپوزیشن لیڈر بنے اور ان کے بارے میں نوٹیفکیشن جاری کرنے سے پہلے اسپیکر قومی اسمبلی نے تمام ضروری حقائق کی تصدیق کی لیکن اب ایسا نظر آرہا ہے کہ 13 ستمبر تک جو مرکز میں حکومت کے اتحادی تھے اب وہ مرکز میں اپوزیشن لیڈر کی کرسی پر نظریں جما رہے ہیں حالانکہ حیران کن حد تک پنجاب میں اسی جماعت سے ان کا اتحاد ابھی تک برقرار ہے۔ چودھری پرویزالٰہی نے اسپیکر کوبھجوائے جانے والے اپنے استعفیٰ میں مزید کہا کہ پارلیمانی جمہوری نظام کی بقا اور تسلسل کیلئے اپوزیشن لیڈر کی پوزیشن سے استعفیٰ دے رہے ہیں ۔