اگر امریکہ پر کوئی اور حملہ ہو ا تو وہ پاکستانی قبائلی علاقوں سے ہوگا ،جنرل ڈیوڈ پیٹرس:

واشنگٹن (اُردو پوائنٹ۔23مئی۔2008ء)امریکی فوج کی مرکزی کمان کیلئے نامزد کئے گئے کمانڈرجنرل ڈیوڈپیٹرس نے کہا ہے کہ اگر امریکہ پر کوئی اور حملہ ہو ا تو وہ پاکستانی قبائلی علاقوں سے ہوگا ۔جنرل ڈیوڈ پیٹرس نے کہا ہے کہ جیسے ہی انہیں اپنے اس نئے عہدے کی منظور ی ملے گی وہ سب سے پہلے پاکستان کا دورہ کرینگے ۔ برطانوی نشریاتی ادارے کے مطاقب گزشتہ روز انہوں نے امریکی سینیٹروں سے کہاکہ القاعدہ اب عراق پر سب سے زیادہ توجہ دے رہی ہے لیکن ایک حقیقت یہ بھی ہے کہ قبائلی علاقوں میں ان کے ہاتھ کافی مضبوط ہو چکے ہیں اور اگر امریکہ پر اگلا حملہ ہوا تو اس کی منصوبہ بندی فاٹا میں ہی ہوگی واضح رہے پچھلے کچھ دنوں سے امریکی سینیٹر قبائلی علاقوں کے حالات اور مقامی طالبان اور حکومت کے درمیان سمجھوتے پر تشویش کر چکے ہیں اور بش انتظامیہ سے سوال کررہے ہیں کہ کیا وجہ ہے کہ اتنے ڈالر خرچ کر کے بھی کوئی کامیابی نہیں مل رہی ہے واضح رہے کہ امریکہ کے دفتر خارجہ کے ترجمان شان میکارمک نے کہا کہ ہم یہ نہیں دیکھنا چاہیں گے کہ سمجھوتے کی آڑ میں شدت پسندوں کو دہشت گردی کی منصوبہ کی آزادی مل جائے۔ وہ یہ دیکھنا چاہیں گے کہ جو لوگ پہلے سیاسی عمل کا حصہ نہیں بننا چاہتے تھے کیا وہ اب اس میں شامل ہوں گے اور خون خرابہ چھوڑ دیں گے۔ دوسری طرف برطانیہ نے حکومت پاکستان کی قبائلی علاقوں میں امن بات چیت کی حمایت کی ہے افغانستان اور پاکستان میں شدت پسندی روکنے کا فوجی حل نہیں ہو سکتا لیکن سمجھوتہ یا بات چیت انہی لوگوں سے ہونی چاہیے جو خون خرابہ چھوڑنے کو تیار ہو۔

__________________