اسلام آباد.... ایبٹ آباد اورگلیات میں بارش اور برف باری کا سلسلہ شروع ہوگیا ہے۔نتھیا گلی اور اس کے گردونواح میں ایک فٹ تک برف پڑچکی ہے اور ایبٹ آباد سے مری جانے والی مرکزی شاہراہ سمیت کئی سڑکیں بند ہوگئی ہیں۔ایبٹ آباد اور گلیات میں ہفتے کی صبح سے ہی ہلکی بارش اور برفباری کا سلسلہ وقفے وقفے سے جاری ہے۔ نتھیا گلی ،ٹھنڈیانی ،ایوبیہ اور چھانگلہ گلی میں اب تک ایک فٹ سے زائد برف پڑ چکی ہے ۔اس وجہ سے ایبٹ آباد سے مری جانے والی مرکزی شاہراہ نتھیا گلی کے قریب ہر قسم کی ٹریفک کے لئے بندہوگئی اس کے علاوہ نتھیا گلی، بکوٹ روڈ،نتھیا گلی نملی میرا روڈ،خانس پور، ایوبیہ روڈ،زیارت معصوم روڈ اور لہور کس روڈبرف باری کے باعث بند ہوگئے ہیں۔اس صورت حال کے باعث علاقے کے لوگوں کو شدید مشکلات کا سامناہے ۔برفباری اور بارش سے علاقے میں سردی کی شدت مزید بڑھ گئی ہے۔محکمہ موسمیات کے ذرائع کے مطابق ان علاقوں میں برف باری کا سلسلہ آئندہ چار روز تک جاری رہنے کا امکان ہے۔