واشنگٹن…بین الاقوامی جوہری توانائی ایجنسی کو پیش کی جانے والی حالیہ معلومات میں انکشاف کیا گیاہے کہ ایران سال 2003 میں نیوکلیئر ہتھیاروں کی تیاری کا منصوبہ ترک کرچکا ہے۔ادھر واشنگٹن میں ایران پر نئی پابندیوں سے متعلق غور کے لیے دنیا کے چھ اہم ممالک کے نمائندوں کا اجلاس ہورہا ہے۔اقوام متحدہ کے سفارت کاروں نے بتایا کہ اقوام متحدہ کی جوہری توانائی ایجنسی کے حکام کو حالیہ پیش کی جانے والی معلومات سے ظاہر ہوتا ہے کہ ایران سال 2003 میں ایٹمی ہتھیاروں کی تیاری کا منصوبہ ترک کرچکا ہے۔تاہم اقوام متحدہ میں برطانوی سفیر Simon Smith کا کہناہے کہ ایران کے جوہری پروگرام کے بارے میں جو معلومات پیش کی گئی ہیں اس کے مطابق ممکن ہے کہ ایران ایٹمی پروگرام بند کرنے سے قبل کچھ ہتھیار تیار کرچکا ہو ۔اس سے قبل امریکی انٹیلے جنس رپورٹ میں بھی یہ بات سامنے آئی تھی کہ ایران نے سال 2003 میں ایٹمی ہتھیاروں کی تیاری کا کام روک دیاتھا۔دوسری جانب واشنگٹن میں ایران پر نئی پابندیوں سے متعلق غور کے لیے دنیا کے چھ اہم ممالک برطانیہ ، امریکا ، فرانس ، چین ، روس اور جرمنی کی وزارت خارجہ کے حکام کا اجلاس ہورہا ہے۔اجلاس میں حکام ایران کے معاملے پر غور کررہے ہیں ۔ادھر امریکی محکمہ خزانہ ایران کے مرکزی بینک پر بھی پابندی لگانے پر غور کر رہا ہے۔وزارت خزانہ کو شبہ ہے کہ یہ بینک ان تمام بینکوں کو مدد فراہم کر رہاہے ۔ جن پر امریکا نے اقتصادی پابندیا ں عاید کی تھیں۔۔

__________________