تہران (اے ایف پی / جنگ نیوز) ایران نے امریکا سے بہتر ڈرون طیارے تیار کرنے کا اعلان کرتے ہوئے کہا ہے کہ قبضہ میں لے گئے امریکی ڈرون طیارے سے اہم معلومات حاصل کی گئی ہیں اور ایرانی سائنسدان اس طیارے کا انجینئرنگ کا سارا نظام تبدیل کردیں گے جبکہ ایرانی وزیر خارجہ علی اکبر صالحی نے امریکا کی جانب سے ایران کی فضائی حدود کی خلاف ورزی کو جارحانہ اقدام قرار دیتے ہوئے کہاہے کہ مسئلہ اقوام متحدہ میں اٹھائیں گے۔ تفصیلات کے مطابق پارلیمانی قومی سلامتی کمیٹی کے سربراہ پروفیسر سروری نے کہا کہ طیارے کے سافٹ ویئر کے تمام راز حاصل کرلئے گئے ہیں اور ہم جلد بڑے پیمانے پر ان طیاروں کی پیداوار شروع کردیں گے۔ سروری نے کہا کہ ہمیں اس طیارے کی ٹیکنالوجی کے بارے میں معلومات کیلئے روس یا چین کی مدد کی ضرورت نہیں۔ انہوں نے کہا کہ ہم اپنی صلاحیتوں سے بھرپور فائدہ اٹھائیں گے۔ دوسری جانب ایرانی وزیر خارجہ علی اکبر صالحی نے امریکا کی جانب سے ایران کی فضائی حدود کی خلاف ورزی کو جارحانہ اقدام قرار دیتے ہوئے کہاہے کہ وہ مسئلہ اقوام متحدہ میں اٹھائیں گے ، جاسوس طیارہ مارگرائے جانے پر ایران کی مسلح افواج کی کامیابی امریکا اور دوسرے جارح ممالک کیلئے عبرت کا باعث ہونی چاہئے۔ دشمنوں کا مقابلہ کرنے کیلئے ایران دن رات چوکس رہتا ہے۔

ایران کا امریکی ڈرون سے ٹیکنالوجی حاصل کر کے بہتر طیارے بنانیکا اعلان

__________________

اندازِ بیاں گرچہ بہت شوخ نہیں ہے
شاید کہ اتر جائے ترے دل میں مری بات