ایران کا کینیڈین سفیر کو ملک چھوڑنے کا حکم



اوٹاوہ /تہران(ٹی وی رپورٹ)کینیڈا کی جانب سے ایرانی سفارتی نمائندے کی عدم منظوری پر ایران نے کینیڈا کے سفیر کو ملک سے نکل جانے کا حکم دیا ہے۔کینیڈا کے وزیر خارجہ کی جانب سے جاری کردہ بیان کے مطابق کینیڈین حکومت نے ایران کی جانب سے اپنے سفیر کو تہران چھوڑنے کا حکم دیئے جانے پر افسوس کا اظہارکیاہے اور کہا ہے کہ یہ ایک غیر منصفانہ فیصلہ ہے جس کی کوئی توجیح پیش نہیں کی جا سکتی۔ بیان کے مطابق سفیر کے واپس بھیجے جانے کا فیصلہ اس وقت ہوا جب کینیڈا نے اپنے ملک کے لئے ایرانی سفارتی نمائندے کی منظوری دینے سے انکار کر دیا۔ وزیر خارجہ نے کہاکہ ہمیشہ کی طرح کینیڈا ایرانی سفیر کو قبول کرنے کو تیار ہے بشرطیکہ کسی مناسب امیدوار کو یہ ذمہ داری سونپی جائے۔جبکہایران سے کینیڈا کے سفیر کی بے دخلی کے بعد دونوں ممالک کے درمیان کشیدگی بڑھ گئی ہے۔واضح رہے کہ ایران کے نیوکلیئر پروگرام اور وہاں انسانی حقوق سے متعلق بہت سے مسائل کی وجہ سے کینیڈا اور ایران کے تعلقات کئی برسوں سے کشیدہ تھے اور اب ایک دوسرے کے سفیر کو سرکاری سطح پر قبول نہ کرنے کے بعد کشیدگی میں مزید اضافہ ہوا ہے۔