ایران کے ساتھ تعلقات کو اہمیت دیتے ہیں،یوسف رضا گیلانی
اسلام آباد (جنگ نیوز) وزیراعظم سید یوسف رضا گیلانی نے کہا کہ پاکستان ایران کے ساتھ اپنے تعلقات کو بڑی اہمیت دیتا ہے۔ دونوں ملک مل کر علاقائی اور عالمی امور پر کردار ادا کرتے رہیں گے۔ پاکستان اور ایران علاقے میں اقتصادی استحکام کے لئے ایک موثر اور فعال اقتصادی یونین کے قیام کے لئے قائدانہ کردار ادا کریں۔ منگل کو یہاں وزیراعظم ہاؤس میں ایران کے ثقافتی امور کے بارے میں مشیر آیت اللہ محمد علی تشکری سے ملاقات کے دوران بات چیت کرتے ہوئے وزیراعظم نے کہا کہ پاکستان اور ایران کے تعلقات مشترکہ تاریخی، جغرافیائی، مذہبی، ثقافتی اور دو طرفہ مفاہمت کی بنیاد پر قائم ہیں۔دریں اثناء وزیراعظم یوسف رضا گیلانی نے کہا ہے کہ نئی جمہوری حکومت کو سب سے بڑا چیلنج عوام کو خوراک اور انرجی کی فراہمی کا ہے، وہ سینئر وزیر پنجاب راجہ ریاض کی قیادت میں ملاقات کیلئے آنے والے وفد سے بات چیت کر رہے تھے۔

__________________