ایسے غیر جانبدارانہ انتخابات کرائیں جائیں جو تمام جماعتوں کیلئے قابل قبول ہوں، اے پی ڈی ایم کا کنونشن



اسلام آباد (نمائندہ جنگ) آل پارٹیز ڈیموکریٹک موومنٹ کے کنونشن کے مشترکہ اعلامیے میں کہا گیا ہے کہ 8جنوری کے الیکشن بوگس اور ڈھونگ ہیں۔ کنونشن میں مطالبہ کیا گیا کہ ایسے غیر جانبدارانہ انتخابات کرائے جائیں جو تمام سیاسی جماعتوں کیلئے قابل قبول ہوں۔ اعلامیہ میں مطالبہ کیا گیا ہے کہ جنرل ریٹائرڈ پرویزمشرف کے تین نومبر2007ء کو عدلیہ کے خلاف کئے گئے اقدام کو ختم کرکے اعلیٰ عدلیہ کو 2نومبر2007ء کی پوزیشن پر بحال کیاجائے، عبوری آئینی حکم کے تحت3نومبر2007ء کو حلف نہ اٹھانے والے ججوں کو بحال کیاجائے، بلوچستان، قبائلی علاقہ جات، سوات اور پاکستان کے دیگر علاقوں میں عوام کے خلاف آپریشن بند کیاجائے اور ان علاقوں سے بیرونی عناصر کو دباؤ اور اثرورسوخ استعمال کرکے وہاں سے نکالاجائے تاکہ وہاں پر قانون کی حکمرانی قائم کی جاسکے، اجلاس میں مطالبہ کیا گیا کہ ایمرجنسی کے نفاذ، عبوری آئینی حکم اور ججوں کے حلف کا3نومبر2007ء کا حکم اور پرویز مشرف کے غیرآئینی اور غیر قانونی اقدامات سمیت ایمرجنسی 2007ء آرڈر کالعدم قرار دیاجائے، پرویزمشرف کی طرف سے 12اکتوبر1999ء کو اقتدار پر غیر آئینی طورپرقبضہ اور 28 نومبر 2007ء کو صدر کے عہدے پر انتخاب کو کالعدم قرار دیاجائے جبکہ جنرل ریٹائرڈ اس وقت صدر منتخب ہوئے جبکہ وہ صدر بننے کے اہل بھی نہیں تھے، صدر پرویز مشرف کے غیر آئینی سیٹ اپ کو ختم کرکے ملک کو دوبارہ جمہوری اور آئینی راستے پر ڈالاجائے، جنرل ریٹائرڈ پرویز مشرف کی غیر آئینی اور غیرقانونی حکومت کے تمام اختیارات واپس لے کر قومی اتفاق سے عبوری حکومت قائم کی جائے، آزادانہ الیکشن کمیشن قائم کیاجائے جو ملک میں آزادانہ ،شفاف اور غیر جانبدارانہ انتخابات منعقد کرائے، اے پی ڈی ایم کے مشترکہ اعلامیہ میں مطالبہ کیا گیا کہ ایسے آزاد،منصفانہ اور غیر جانبدارانہ انتخابات منعقد کرائے جائیں جو تمام جماعتوں کے لئے قابل قبول ہوں، جنرل ریٹائرڈ مشرف کے تجویز کردہ آٹھ جنوری کو ہونے والے انتخابات جعلی بوگس اور ڈھونگ ہیں اور ایسے فراڈ الیکشن کا مکمل طورپربائیکاٹ کیاجائے، جنرل ریٹائرڈ مشرف کے میڈیا پر نافذ کئے گئے تمام قوانین اور پابندیوں کو ختم کرکے میڈیا کو آزاد بنایاجائے،صوبہ سندھ کو فاشسٹ قوتوں سے بچایاجائے اور کراچی میں12 مئی2007ء کو خون کی ہولی کھیلنے کی ذمہ دار سیاسی جماعتوں، جنرل ریٹائرڈپرویز مشرف اور عشرت العباد پر مقدمہ چلایا جائے ،اے پی ڈی ایم نے مطالبہ کیا کہ جنرل ریٹائرڈ پرویز مشرف کے دور حکومت میں لاپتہ کئے گئے تمام افراد کو بازیاب کیاجائے۔