کراچی (جنگ نیوز) انڈین کرکٹ لیگ کے بعد ہندوستان میں کھیلے گئے انڈین پریمیئر لیگ نے دنیائے کرکٹ میں تہلکہ مچا دیا۔ اُس کے بعد شائقین کرکٹ کا جوش برقرار رکھنے کیلئے بنگلہ دیش میں سہ فریقی ٹورنامنٹ منعقد کیا گیا جس میں پاکستان نے انڈیا کو شکست سے دوچار کرکے فتح اپنے نام کی اور اب پاکستان کی سرزمین پر ایشیا کپ 2008ء منعقد کیا جارہا ہے، جس کا افتتاحی میچ منگل کو قذافی اسٹیڈیم میں کھیلا جائیگا، جیو سوپر نے شروع دِن سے کرکٹ کے دیوانوں کی دلچسپی کو مدِ نظر رکھا اور مختلف ٹورنامنٹس کے تمام میچ براہ راست نشر کئے جس کی تازہ مثال انڈین کرکٹ لیگ، انڈین پریمیئر لیگ اور سہ فریقی ٹورنامنٹ ہیں۔جیو سوپر نے ہمیشہ کوشش کی ہے کہ ایسے ٹورنامنٹس جن میں پاکستان شریک ہے وہ براہ راست دکھائے جائیں، کرکٹ کے متوالوں کی دلچسپی کو مدِ نظر رکھتے ہوئے 24 جون سے شروع ہونے والے ایشیاء کپ 2008ء کے تمام میچز بھی جیو سوپر براہ راست نشر کرے گا۔ ایشیاء کپ کا افتتاحی میچ 24جون بروز منگل قذافی اسٹیڈیم لاہور میں منعقد کیا جارہا ہے جس میں کل 6 ٹیمیں حصہ لے رہی ہیں جنہیں 2 گروپس میں تقسیم کیا گیا ہے ۔ گروپ A میں سری لنکا، بنگلہ دیش، متحدہ عرب امارات اور گروپ Bمیں پاکستان ، انڈیا اور ہانگ کانگ کی ٹیمیں شامل ہیں۔ فائنل میچ نیشنل اسٹیڈیم کراچی میں کھیلا جائے گا۔ ایشیا کپ کے تمام میچز ڈے اینڈ نائٹ ہونگے۔