ایشیا کپ کرکٹ :کراچی میں 10میچز کھیلے جائیں گے
کراچی ( جنگ نیوز) پاکستان میں کرکٹ جس موسم میں بھی ہو لوگ اسے دیکھنے اسٹیڈیم ضرور جاتے ہیں جون کے اس تپتے موسم میں ایشیا کپ پاکستان میں منعقد کیا جارہا ہے جس کیلئے تمام انتظامات کو حتمی شکل دی جارہی ہے، منگل 24جون کو اس کپ کا افتتاحی میچ میزبان پاکستان اور ہانگ کانگ کے درمیان کھیلا جارہا ہے، قذافی اسٹیڈیم میں ڈے اینڈ نائٹ میچ کیلئے پاکستان کرکٹ بورڈ نے سیکورٹی کے خصوصی اقدامات کئے ہیں ، ایشیا کپ میں کل13میچز کھیلے جانے ہیں جن میں سے فائنل سمیت 10 میچ کراچی میں ہونگے اور اس کیلئے نیشنل اسٹیڈیم کا انتخاب کیا گیا ہے، پاکستان کا مقبول چینل جیو سوپر ان تمام میچوں کو براہ راست دکھا رہا ہے، کھیل کوئی بھی ہو اور کہیں بھی کھیلا جارہا ہے وہ جیو سوپر کی آنکھ سے دور نہیں، جیو سوپر کھیلوں میں پاکستان کی شرکت کو یادگار بنانے کیلئے ا ن تمام میچوں کو براہ راست دکھانے کیلئے خصوصی انتظامات کرتا ہے۔کرکٹ کیلئے ایشیاکی سرزمین کافی زرخیز رہی ہے ،دنیا کے سب سے بڑے براعظم سے کرکٹ کے کئی اسٹارز نے جنم لیاہے ، 24 جون سے ہونیوالے ایشیاکپ میں عصرحاضر کے ایشیائی اسٹارز ایک بار پھر جلوہ گرہوں گے۔کرکٹ کاکھیل جس خطے میں پہنچ جائے دیکھنے والوں کو گرویدہ بنالیتاہے،ایشین سرزمین پرتوکرکٹ کاجادوایساچلا کہ ہرکوئی اس کھیل کادیوانہ ہوگیا۔دنیاکے سب سے بڑے براعظم میں کرکٹ کی بڑھتی مقبولیت کودیکھ کر1984میں پہلے ایشیاکپ کاانعقادکیاگیا تھا ۔

__________________