ایلویٹ ہیلی کاپٹرز اور فوکر ایئر کرافٹ کی پاکستان نیوی میں شمولیت
کراچی (اسٹاف رپورٹر) پاک بحریہ کی حربی صلاحیت کو مزید بہتر بنانے کے لئے دو ایلویٹ ہیلی کاپٹرز اور ایک فوکر ایئر کرافٹ کو پاکستان نیول ایوی ایشن میں شامل کرلیا گیا ۔ ان ایئر کرافٹ کو نیول فلیٹ کا باقاعدہ حصہ بنانے کی ایک پروقار تقریب نیول ایوی ایشن بیس پی ایس مہران میں منعقد ہوئی۔ چیف آف نیول اسٹاف ایڈمرل محمد افضل طاہر تقریب کے مہمان خصوصی تھے ۔ پاک بحریہ نے متخلف میری ٹائم آپریشنز کی انجام دہی کے لئے فوکر میں اسٹیٹ آف دی آرٹ سینسرز اور ہتھیار نصب کئے ہیں ۔ فوکر جہاز پی آئی اے سے حاصل کیا گیا ہے جس نے 2006 میں اپنے فوکر فلیٹ کو گراؤنڈ کردیا تھا۔ پی آئی اے کے ساتھ ہونے والے سمجھوتے میں اضافی سپورٹ اور متعلقہ مینٹیننس سہولیات کے تبادلے کے لئے دو مزید فوکر جہاز بھی شامل تھے ۔ تقریب سے خطاب کرتے ہوئے مہمان خصوصی ایڈمرل محمد افضل طاہر نے کہا کہ موجودہ سیاسی و جغرافیائی منظرنامہ اور سیکورٹی ماحول اس بات کا متقاضی ہے کہ زمانہ جنگ کی تیاریوں کے ساتھ ساتھ پاک بحریہ آزادانہ طورپر یا اتحادی کی حیثیت سے زمانہ امن کے دوران مختلف آپریشنز کی انجام دہی کے لئے ہمہ وقت تیار رہے ۔ انہوں نے کہا اس ضمن میں کثیر القومی بحری اتحاد میں پاک بحریہ کی شمولیت قابل ذکر ہے ۔ چیف آف نیول اسٹاف نے کہا کہ نئے پلیٹ فارمز کی شمولیت سے پاک بحریہ میں ایک مثبت تبدیلی آئی ہے اور وہ مستقبل کے تمام چیلنجوں کا بھرپور طریقے سے مقابلہ کرسکے گی ۔ تقریب کے اختتام پر نئے شامل ہونے والے فوکر اور ایلویٹ ایئر کرافٹ کا قابل دید فلائی پاسٹ کا مظاہرہ کیا گیا۔ دیگر مہمانوں کے علاوہ کمانڈر پاکستان فلیٹ وائس ایڈمرل نعمان بشیر نے بھی تقریب میں شرکت کی ۔

__________________