اسلام آباد (جنگ نیوز) پاکستان میں متعین امریکی سفیر این ڈبلیو پیٹرسن نے کہا ہے کہ میڈیا کو رپورٹنگ اور حکومت پر تنقید کیلئے آزاد ہونا چاہئے، پاکستان میں تین نومبر کو نافذ کی گئی ایمرجنسی جمہوریت کی طرف پیشرفت کیلئے سخت دھچکا ہے، حکومتِ پاکستان برسوں میں حاصل کی گئی کامیابیوں کو ہفتوں میں ضائع نہ کرے۔ ان خیالات کا اظہار انہوں نے گزشتہ روز نیشنل ڈیفنس یونیورسٹی میں خطاب کے دوران کیا۔ انہوں نے کہا کہ 3 نومبر کو ہنگامی حالت کے نفاذ نے پاکستان کی معیشت اور ترقی کو خطرہ سے دو چار کردیا ہے جو ایک براشگون ہے۔ انہوں نے کہا کہ ایسے واقعاتی شواہد موجود ہیں جن سے پتہ چلتا ہے کہ امریکی سرمایہ کاروں نے ”انتظار کرو اور دیکھو“ کا رویہ اپنا لیا ہے۔ انہوں نے کہا کہ جتنا زیادہ عرصہ تک ماورائے آئین اقدامات برقرار رہیں گے اتنا ہی دیر پا نقصان پاکستان کی معیشت کو پہنچے گا۔ انہوں نے زور دے کر کہا کہ انتخابات کو ناقابل اعتبار بنانے کیلئے حکومت کو لازماً چاہئے کہ وہ حزب اختلاف کے رہنماؤں اور کارکنوں کو جیلوں یا نظر بندی سے رہا کریں اورمیڈیا کو رپورٹنگ کرنے اور حکومت پر نکتہ چینی کرنے کیلئے آزاد ہونا چاہئے۔ امریکی سفیر نے کہا کہ صدر مشرف کی عظیم ترین کامیابیوں میں سے ایک آزاد اور متحرک میڈیا کا پھلنا پھولنا ہے ایسا کوئی طریقہ نہیں ہے کہ جس کے ذریعے اب میڈیا کو پابند کرکے اس ”جن“ کو بوتل میں واپس بھیجا جاسکے۔ سفیر نے کہا کہ ہمارے دو طرفہ تعلقات ہمارے وسیع تر مشترکہ مفادات پر محیط ہیں اور محض سلامتی تک محدود نہیں ہیں۔ انہوں نے بار بار دہرائی جانیوالی اس بات کو مسترد کردیا کہ امریکا پاکستان کا ایک ناقابل اعتبار حلیف ہے۔ امریکی سفیر نے ایسی باتوں کو دونوں ملکوں کو درپیش مسائل سے توجہ ہٹانے والی بات قرار دیا۔ انہوں نے کہا کہ دہشت گردی کے خلاف پاکستان کی لڑائی دہشت گردی کے خلاف دنیا کی لڑائی بھی ہے۔ انہوں نے اس بات پر حیرانی کا اظہار کیا کہ یہ کہا جاتا ہے کہ پاکستان امریکا کی جنگ لڑ رہا ہے۔ انہوں نے زور دے کر کہا کہ پاکستان اقتصادی ترقی جاری رکھنے اور اہل پاکستان کو اپنی مرضی سے زندگی گزارنے کا حق دینے کیلئے اپنی سرحدوں کے اندر سرگرم شدت پسندوں اور عسکریت پسندوں سے نمٹے۔

__________________