اسلام آباد/لاہور( نمائندگان جنگ) ایمرجنسی کیخلاف مختلف شہروں میں اے پی ڈی ایم، پیپلز پارٹی اوراے این پی نے احتجاجی مظاہرے کئے، اسلام آباد آبپارہ چوک پر اے پی ڈی ایم کے تحت مظاہرہ کیاگیا۔ جس میں آمریت کیخلاف نعرے لگائے گئے۔مظاہرین نے پلے کارڈز اور بینرز اٹھا رکھے تھے،اور وہ آمریت کیخلاف نعرے لگارہے تھے،اس موقع پر مقررین نے کہا کہ ہماری جدو جہد جنرل پرویز نہیں فوج کے سیاسی کردار کیخلاف ہے۔ تفصیلات کے مطابق ایمرجنسی اور پی سی او کے نفاذ کے خلاف منگل کو اے پی ڈی ایم کے زیر اہتمام آبپارہ چوک اسلام آباد میں احتجاجی مظاہرہ کیاگیا ، مظاہرین نے کتبے اور بینرز اٹھا رکھے تھے جن پر آمریت کے خلاف نعرے درج تھے۔ اس موقع پر تحریک انصاف کے رہنماجمیل عباسی نے مظاہرین سے خطاب کرتے ہوئے کہا کہ ہماری جدوجہد صرف جنرل پرویز مشرف کی ذات کیخلاف نہیں بلکہ فوج کے سیاسی کردار کے خلاف ہے اورہم آمریت کے خاتمہ کے لئے جدوجہد جاری رکھیں گے۔مظاہرے سے عاصم سجاد اورارشاد مہرعلی نے بھی خطاب کیا۔ ادھر پیپلز پارٹی کے گرفتار 50کارکنوں کومنگل کی رات گئے اڈیالہ جیل سے رہا کردیاگیا۔ جیل سے باہر آنے والوں پر پھولوں کی پتیاں نچھاور کی گئیں۔ اس موقع پر پیپلز پارٹی کے کارکنوں نے نعرے لگائے۔ پشاور میں اے این پی کی جانب سے ایمرجنسی کے نفاذ کے خلاف احتجاجی مظاہروں کے دوران بعض قائدین کے علاوہ سرگرم مقامی رہنماؤں کو بھی گرفتار کرلیاگیا۔ مردان میں پیپلزپارٹی نے پاکستان چوک مردان میں احتجاجی مظاہرہ کیا اور روڈ پرٹائر جلا کر ٹریفک جام کردی۔دریں اثناء جمعیت طلبہ پاکستان کے ناظم اعلیٰ نصر اللہ خان گورائیہ نے ملک میں ایمرجنسی کے نفاذ ، آئین کی معطلی ، نجی چینلز کی بندش، اعلیٰ عدالتوں کے ججز کو برطرف کرنے اور اندھا دھند گرفتاریوں کے خلاف ملک گیر”پاکستان بچاؤ تحریک“ کا اعلان کرتے ہوئے کہا ہے کہ (آج) بدھ 14 نومبر سے تعلیمی بائیکاٹ، احتجاجی مظاہروں اورتعلیمی اداروں میں برطرف ججز کے نام سے منسوب کارنر قائم کرنے کا سلسلہ شروع کیاجائے گا۔ وہ مسجد الٰہی نورٹینچ بھاٹہ کے باہر طلباء کے احتجاجی مظاہرے سے خطاب اوربعد ازاں صحافیوں سے گفتگو کر رہے تھے اس موقع پر راولپنڈی کے ناظم بشیر حسین بھی ان کے ہمراہ تھے۔نصر اللہ خان نے کہا کہ آج14نومبر کو تمام تعلیمی اداروں میں یوم سیاہ منایاجائے گا۔

__________________