کوئٹہ(جنگ نیوز)نگران وزیراعلیٰ بلوچستان سردار محمد صالح بھوتانی نے کہا ہے کہ ملک سے ایمرجنسی کا خاتمہ اور 1973ء کے آئین کی مکمل بحالی ایک تاریخی اقدام ہے۔ صدر پرویز مشرف نے قوم سے کئے گئے ایک اور وعدے کو پورا کر دکھایا ہے، سیاسی جماعتیں ملک میں جمہوریت کے استحکام کیلئے اپنا مثبت کردار ادا کرتے ہوئے انتخابات میں بھر پور حصہ لیں اور عوام کو اپنا حق رائے دہی استعمال کرنے کا موقع دیں ۔ان خیالات کا اظہار انہوں نے ملک میں ایمرجنسی کے خاتمہ اور آئین کی بحالی کے سلسلے میں اپنے تاثرات بیان کرتے ہوئے کیا۔ انہوں نے کہا کہ اب سیاسی جماعتوں کی ذمہ داری ہے کہ وہ ملک میں جمہوریت کے استحکام کیلئے اپنا مثبت کردار ادا کریں ۔ انہوں نے کہاکہ ملک میں ایمرجنسی کے نفاذ سے معمول کے حالات پر کوئی اثر نہیں پڑا، ترقی کا تسلسل جاری رہا اور لوگوں کے مسائل بھی حل ہوتے رہے ہیں۔

__________________