پاکستان کی تاریخ اور سیاست بھی ایک عجب نمونہ ہے۔ اسکی عطب نیرنگیاں ہیں۔ پاکستان کے کسی بھی چیز کے بارے میں وثوق سے نہیں کہا جا سکتا کہ کب یہ پلٹا کھا لے گی۔
اس ملک میں ایک دن اگر کوئی ہیرو کے روپ میں نمودار ہوتا ہے تو آنے والے دن اسی ہیرو کو ایک ولن کے روپ میں پیش کر رہے ہوتے ہیں۔ اور اگر کوئی دن کسی شخص پر کیچڑ اچھال رہا ہوتا ہے تو آنے والے دنوں میں وہ شخص پاکباز ظاہر ہو رہا ہوتا ہے۔
اسکی مثال یوں بھی لے سکتے ہیں کہ جب کارگل جنگ کا آغاز اور انجام ہو رہا تھا تو ہمارے سامنے پاکستانی افواج کو فاتح کے روپ میں پیش کیا گیا جبکہ بھارتی افواج کی بزدلی کا مضحکہ اڑاتے ہوئے بریگیڈیر راشد قریشی قوم کی آنکھوں میں دھول جھونکتے رہے۔ مجھے اچھی طرح یاد ہیں وہ دن کہ جب نواز شریف کو دلائل کے ساتھ کارگل جنگ کی شکست کا ذمہ دار ٹھہرایا جاتا تھا۔ یہی مشرف اور انکا چمچہ بریگیڈیر راشد قریشی ایک کے بعد ایک دلیل لا کر نواز شریف کو جنگ کی شکست کا ذمہ دار ٹھہرا رہے تھے۔ پھر وقت نے پلٹا کھایا اور تقریباََ دس سال بعد قوم پر انکشاف ہوا کہ کارگل جنگ میں مشرف کی ناقص حکمت عملی کے باعث پاکستانی افواج کے بے تحاشہ جانی نقصان ہوا تھا اور نواز شریف اگر آخری وقت میں امریکہ جا کر اپنی ناک نہ رگڑتا تو پاکستانی افواج کی ناک رگڑی جانی تھی۔ وہی سابقہ ہیرو مشرف آج کا ولن بن گیا اور سابقہ ذلیل و رسوا نواز شریف آج کا ہیرو ہے اور کمانڈو مشرف اس سے چھپتا پھر رہا ہے
اسی قسم کی تاریخی بو العجبی ایم کیو ایم کے ساتھ ہوئی
بے نظیر دور میں کراچی میں شروع ہونے والا فوجی آپریشن ۔ ۔ ۔ جس میں ایم کیو ایم کو ملک دشمن اور را کا ایجنٹ ٹھہرایا گیا۔ ایم کیو ایم کے دفاتر سے جناح پور کے نقشے بر آمد کر کے اسکو علحدگی پسند تنظیم مکتی باہنی کا روپ دیا گیا۔ اسکے ٹارچر سیلز کی تصاویر سے اخبارات مزین ہوئے۔اور پوری قوم میں ایم کیو ایم کے خلاف ایک نفرت کی فضا پیدا کر دی گئی یا اور کچھ نہیں تو مجھ جیسے کمزور دل کے افراد ایم کیو ایم کا نام سنتے ہی خوف سے لرزنے لگتے تھے۔ آج اسی ایم کیو ایم کے لیے یوم فتح ہے۔
آج سابق انٹیلیجنس بیورو چیف اور آئی ایس ائی کے انٹرنل ونگ کے سربراہ بریگیڈیر امتیاز نے ایک ٹی وی پروگرام میں تسلیم کیا کہ جناح پور کے نقشے بر آمد ہونا ایک ڈرامہ تھا۔ انہوں نے تسلیم کیا کہ ایم کیو ایم کا پاکستان سے علیحدگی کا کوئی پروگرام نہیں تھا (اسی طرح امید کی جا سکتی ہے کہ ایم کیو ایم پر ٹارچر سیلز والا بھی محض الزام ہی ہوگا کیونکہ بریگیڈیر امتیاز نے اس بارے میں باوجود پوچھنے کے کوئی جواب نہیں دیا)۔

چناچہ سترہ سال تک عوام کی اکثریت میں ولن کا روپ پانے والی جماعت ایم کیو ایم کے دامن پر لگا ایک بدنما داغ خود ایک آرمی آفیسر نے دھو ڈالا۔ میری طرف سے میرے دل کی گہرایوں سے ایم کیو ایم اور ایم کیو ایم کے ساتھیوں کو بہت بہت مبارک ہو۔ باوجود ایم کیو ایم پالیسی مخالف ہونے کے مجھے یہ سن کر اسی طرح خوشی ہوئی جس طرح کسی ایم کیو ایم کے ہمدرد کو ہوئی ہو گی۔

لیکن اس کے ساتھ ساتھ ایک اہم سوال خود پاکستان آرمی کی Credibilityپر اٹھتا ہے۔کیا پاکستان آرمے کے ذمہ داران اس آپریشن کے نتیجے میں ہونے والے ایم کیو ایم کے نقصان اور بالاخر پاکستان کو نقصان کی جواب دہی کریں گے؟ کیا ہمکو آئیندہ پاکستان آرمی کے زیر اہتمام ہونے والے کسی بھی آپریشن پر اعتماد کرنا چاہیے؟ کیا تاریخ پھر کبھی پلٹا کھائے گی اور ہم کو بتائے گی کہ شمالی علاقہ جات میں ہونے والا نام نہاد طالبان کے خلاف آپریشن بھی اسی طرح کا تھا جس طرح آرمی نے ایم کیو ایم کے خلاف کیا؟ یا تاریخ کچھ اور بھی اپنے پٹارے سے نکالے گی؟

آخر میں ایک بار پھر ایم کیو ایم کو میری طرف سے مبارک ہو۔ اور میرا انکو مشورہ ہے کہ وہ پاکستان آرمی اور حکومت پاکستان پر اس آپریشن کے ازالے کے لیے سپریم کورٹ آف پاکستان میں مقدمہ درج کروائے۔تاکہ آئیندہ کسی طالع آزما کو اس قسم کے ایڈونچر کا شوق نہ جاگے۔

بدرالزمان