کراچی (جنگ نیوز) 12/اکتوبر1999ء سے اب تک صدر پرویز مشرف کی زیر قیادت پاکستان میں رونما ہونے والی تبدیلیوں اور عوامی سوچ کا ایک جائزہ ایوارڈ یافتہ ڈاکومنٹری ”ڈنر ود پریذیڈنٹ“ میں پیش کیا گیا ۔ جیو نیوز اور جیو ٹی وی نے اپنے ناظرین کے لیے یہ خصوصی دستاویز ی فلم اتوار کی شام 07:05 پر جیو نیوز سے اور رات گیارہ بجے جیو ٹی وی سے نشر کی جارہی ہے جس میں صدر پرویز مشرف کی والدہ ، اُن کے دوست احباب اور سیاسی شخصیت قاضی حسین احمد کے علاوہ عام شہریوں سے صدر پرویز کی قیادت اور کردار پر بات کی گئی۔ صدر پرویز مشرف کی والدہ بیگم زرین مشرف اس پروگرام میں مختلف سوالات کا جواب دیتے ہوئے کہا کہ پرویز مشرف اپنی جوانی میں بھی ایسی ہی ہمت رکھتے تھے ، اِن میں بچپن سے لیڈر شپ کی خصوصیت تھی۔ اِن کے دوست احباب جب بھی کوئی شرارت کرنا چاہتے تو پرویز مشرف کی طرف دیکھتے تھے اور یہ بات میں اِس لئے نہیں کہہ رہی کہ یہ میرا بیٹا ہے بلکہ یہ محب وطن بھی ہے۔ اُنہوں نے کہا کہ پرویز مشرف میں یکسوئی نہیں تھی کیونکہ اِس کی توجہ پڑھائی پر نہیں تھی ۔ معروف سیاسی شخصیت اور ایم ایم کے صدر قاضی حسین احمد نے اپنے خیالات کا اظہار کرتے ہوئے کہا کہ دراصل یہ اس یو ٹرن کا نتیجہ ہے جو پرویز مشرف نے اس وقت لیا تھا جب امریکی اور ناٹو افواج نے افغانستان پر حملہ کیا تھا اور اُنہوں نے طالبان پر 9/11 کے واقعے کا الزام عائد کیا تھا۔ اسی وجہ سے پرویز مشرف نے فیصلہ کیا کہ وہ نام نہاد دہشت گردی کے خلاف امریکا کے اتحادی بنیں گے۔ وہ تمام سرگرمیاں جنہیں جہاد کہا جاتا تھا جسے امریکا نے منظور بھی کیا تھا، یورپی ممالک سمیت سب نے قبول کیا تھا لیکن اچانک وہ جہاد دہشت گردی بن گیا اور اسی وجہ سے اختلافات پیدا ہوئے ۔ اس عمل سے نہ صرف مذہبی جماعتوں بلکہ فوج بھی اندرونی طور پر بہت متاثر ہوئی ۔ اس پروگرام میں صدر پرویز کے اب تک کے اقدامات کی حمایت اور مخالفت میں عوام کی رائے بھی شامل ہے ۔