لاہور(جنگ نیوز) پی پی پی کے شریک چیئرمین آصف علی زرداری نے کہا ہے کہ ایوان صدر کے لئے جلد پیپلز پارٹی کا کارکن نامزد کیا جائے گا،روٹی، کپڑا اور مکان کا وعدہ بھولے نہیں،جمہوریت اور قوم کیلئے جان دینے کو تیار ہوں۔وہ جمعرات کی شام ایوان اقبال لاہور میں پی پی پی کے مرکزی جنرل سیکرٹری و سابق وفاقی وزیر جہانگیر بدر کی کتاب ”جمہوریت کا ارتقاء“ کی تقریب اجراء سے خطاب کر رہے تھے جس کا دیباچہ محترمہ بینظیر بھٹو نے اپنی شہادت سے چند روز قبل تحریر کیا تھا۔آصف زرداری نے کہا کہ پی پی پی اپنے عوامی منشور پر روز اول کی طرح آج بھی کاربند ہے اور غریبوں‘ مزدوروں‘ محنت کشوں‘ طالبعلموں‘ خواتین‘ بچے‘ بوڑھے‘ بزرگوں‘ محب وطن جیالوں کے حقوق کیلئے بھرپور جدوجہد جاری رکھے ہوئے ہے جبکہ بھٹو شہید کے روٹی‘ کپڑا‘ مکان کے نعرے کو عملی تعبیر دینے کیلئے ہنگامی و انقلابی بنیادوں پر تمام ممکن اقدامات کئے جارہے ہیں اور وہ دن دور نہیں جب ہم اپنے نعرے کو حقیقی شکل دیتے ہوئے ہر غریب کو روٹی بھی دینگے‘ کپڑا اور مکان بھی۔ یہ شہید قائد کا وعدہ اور خواب ہے جس کیلئے ذوالفقار علی بھٹو شہید نے پھانسی کے پھندے کو چوما اور بھٹو خاندان کے 5 پیاروں کی شہادتوں کا سفر محترمہ بینظیر بھٹو تک جاپہنچا۔ نیز ہم آج بھی پوری قوم کو گواہ بنا کر یہ وعدہ کرتے ہیں کہ جمہوریت اور قوم کیلئے محترمہ کے نقش قدم پر چلتے ہوئے آصف علی زرداری کی ہزار جانیں بھی ہوں تو وہ قربان کرنے کیلئے تیار ہے۔ اسی طرح پی پی پی کا ہر جیالا اپنی قائد کے فرمودات پر عمل کرتے ہوئے اپنی گردنیں کٹوانے اور تن من دھن قربان کرنے کیلئے تیار ہے۔ آصف علی زرداری نے کہا کہ جن طاقتوں نے بھٹو خاندان پر پاکستان کی زمین تنگ کی تھی آج خود ان پر عرصہ حیات تنگ ہو چکا ہے۔ ان میں سے کوئی آسٹریلیا بھاگ رہا ہے اور کوئی دوسرے ملک دم دبائے بھاگنے کی تیاری کر رہا ہے۔ انہوں نے کہا کہ ہم بھٹو خاندان کے دشمنوں کو بتا دینا چاہتے ہیں کہ بھٹو کل بھی زندہ تھا بھٹو آج بھی زندہ ہے اورکل بھی زندہ رہے گا۔