ایوانِ وزیراعلیٰ پنجاب کو خواتین کی آئی ٹی یونیورسٹی بنادیا گیا
لاہور (نمائندہ جنگ) وائٹ ہاؤس ،10 ڈاوئننگ اسٹریٹ اور بکنگھم پیلس سے خوبصورت غریب ملک میں بننے والے وزیراعلیٰ پنجاب ہاؤس، جس کی تعمیر پر ڈیڑھ ارب روپے خرچ ہوئے تھے، کو خواتین کی انفارمیشن ٹیکنالوجی(آئی ٹی) یونیورسٹی بنانے کے احکامات جاری کردیئے گئے جبکہ نیا چیف منسٹر ہاؤس تقریباً50کروڑ روپے کی لاگت سے تعمیر ہوا ہے۔سابقہ ایوان وزیراعلیٰ پنجاب کی خوبصورت محل نما بلڈنگ کے احاطے میں ایک کروڑ روپے کی لاگت سے فوارے چل رہے ہیں جبکہ کروڑوں روپے مالیت کی 16 قیمتی گاڑیاں کھڑی ہیں جن میں سے 9 گاڑیاں بلٹ پروف ہیں ان میں 7 گاڑیوں کی خریداری پر 51 کروڑ 18 لاکھ روپے جبکہ 9 بلٹ پروف گاڑیوں کی خریداری پر 48 کروڑ 94 لاکھ روپے خرچ ہوئے ہیں،چیف منسٹر ہاؤس میں کل 137 گاڑیاں ہیں ۔مسلم لیگ ن کے میڈیا کوآرڈی نیٹر نے صحافیوں کو 8 کلب روڈ میں بریفنگ دیتے ہوئے کہا 8 کلب روڈ جو نیا وزیراعلیٰ ہاؤس بنایا گیا ہے، اس کا رقبہ 17.5 کنال پر محیط ہے، جس کی بلڈنگ کی تعمیر پر 35 کروڑ 35 لاکھ روپے لاگت آئی۔11 کروڑ 90 لاکھ روپے کی اضافی رقم اس عمارت کی تزئین و آرائش پر خرچ کی گئی ہے۔

__________________