ایٹمی اثاثوں کی حفاظت خود کریں گے،عالمی مبصرین کی ضرورت نہیں،نواز شریف



لاہور (جنگ نیوز)سابق وزیراعظم اور مسلم لیگ ن کے سربراہ میاں نوازشریف نے کہاہے کہ جوہری پروگرام کی نگرانی کیلئے عالمی مبصرین کی ضرورت نہیں ہے پاکستان اپنے ایٹمی اثاثوں کی خود حفاظت کرسکتاہے۔ ملک میں مسائل کا حل حقیقی جمہوریت میں ہے‘ ہمارے دور حکومت میں خود کش حملے ہوئے اور نہ ہی اسامہ سے کوئی تعلق ہے۔ ایک غیر ملکی اخبار کو انٹرویو دیتے ہوئے نوازشریف نے کہاکہ جوہری اثاثوں کے تحفظ سے متعلق جمہوری حکومتیں ذیادہ ذمہ دار تھیں۔ بینظیر بھٹو شہید اور ان کے دور حکومت میں جوہری ہتھیاروں کے پھیلاؤ کا کوئی کیس بھی سامنے نہیں آیا۔ انہوں نے کہاکہ ان کے دور حکومت میں ملک میں کوئی خود کش حملہ نہیں ہوا اور نہ ہی مذہبی عناصر ملک کیلئے کوئی خطرہ تھے۔ انہوں نے کہاکہ ملک کو درپیش تمام مسائل کا حل حقیقی جمہوریت میں ہے۔ نوازشریف نے کہاکہ اسامہ بن لادن سے کوئی تعلق نہیں ہے بلکہ سابق امریکی انتظامیہ کا افغانستان کے مجاہدین کے ساتھ قریبی تعلق رہاہے۔ انہوں نے کہاکہ وہ ملک میں جمہوریت‘ قانون کی حکمرانی‘ آزاد عدلیہ اور ذرائع ابلاغ کیلئے اور آمریت کے خلاف جدوجہد جاری رکھیں گے۔ ایک سوال کے جواب میں نوازشریف کا کہنا تھا کہ پاکستان اپنے جوہری اثاثوں کی خود حفاظت کرسکتاہے اس کیلئے عالمی مبصرین کی ضرورت نہیں۔