اسلام آباد ۔۔۔۔۔۔۔ پاکستان نے کہا ہے کہ پاک فوج دہشت گردی سے نمٹنے کی بھرپور صلاحیت رکھتی ہے کسی ملک کو اپنے علاقوں میں فوجی آپریشن کی اجازت نہیں دینگے۔ پاکستان کے ایٹمی اثاثے محفوظ ہاتھوں میں ہیں امریکہ کی حکومت نے کبھی بھی اپنے تحفظات کا اظہار نہیں کیا۔ امریکی صدارتی امیدوار سیاست چمکانے کیلئے بیان بازی کررہے ہیں۔ وہائٹ ہاؤس میں ہونے والے خفیہ اجلاس کا علم نہیں ہے۔ ان خیالات کا اظہار دفتر خارجہ نے ترجمان محمد صادق نے سرکاری ٹی وی کو انٹرویو دیتے ہوئے کیا۔ انہوں نے کہاکہ بیرونی میڈیا کو ہماری کامیابی نظر نہیں آرہی، امریکی میڈیا کی رپورٹوں پر دھیان نہیں دیتے‘ امریکہ میں پاکستان کے حوالے سے رپورٹیں چھپتی ہیں اور پاکستانی میڈیا میں امریکہ کے حوالے سے رپورٹس شائع ہوتی ہیں، انہوں نے کہاکہ امریکی حکومت نے کبھی بھی ہمارے ایٹمی اثاثوں پر تحفظات کا اظہار نہیں کیا اور نہ ہی آپریشن کیلئے ڈیمانڈ کی ہے۔ انہوں نے کہاکہ ہماری فوج دہشت گردی سے نمٹنے کی بھرپور صلاحیت رکھتی ہے اور امریکہ یہ بھی جانتا ہے کہ ہم اپنی سرزمین پر خود کارروائی کرتے ہیں، اپنی حدود میں کسی کو کارروائی کی اجازت نہیں دیتے، انہوں نے کہاکہ ہمیں انٹیلی جنس شیئرنگ کی ضرورت ہے فورسز کی نہیں۔انہوں نے کہاکہ ہمارے دوستوں کو سمجھنا چاہئے کہ پاکستان نے دہشت گردی کے خلاف جنگ میں سب سے زیادہ قربانیاں دی ہیں اور دے رہاہے۔