راولپنڈی(جنگ نیوز) نیشنل کمانڈ اتھارٹی نے پاکستان کی اسٹرٹیجک صلاحیت کے حوالہ سے پیشرفت پر اطمینان کا اظہار کرتے ہوئے اس امر کا اعادہ کیا ہے کہ ملک کے جوہری اثاثے محفوظ اور ان کی سیکورٹی فول پروف ہے، پاکستان اپنے مفادات کا دفاع کرنے کی بھرپور صلاحیت رکھتا ہے، پاکستان کے ایٹمی پروگرام کے حوالے سے مہم جوئی کا تصوّر کرنے والے باز رہیں۔ اتھارٹی کا اجلاس جمعہ کو یہاں صدر پرویز مشرف کی زیر صدارت منعقد ہوا جس میں نگراں وزیراعظم محمد میاں سومرو، چیئرمین جوائنٹ چیفس آف اسٹاف کمیٹی جنرل طارق مجید، سروسز چیفس، سینئر فوجی افسران اور سائنسدانوں نے شرکت کی۔ نیشنل کمانڈ اتھارٹی نے پاکستان کی اسٹرٹیجک صلاحیت سے متعلق مختلف منصوبوں پر پیشرفت کا جائزہ لیا اور اس کی رفتار پر اطمینان کا اظہار کیا۔ اتھارٹی نے ملک کی دفاعی صلاحیت کو تقویت دینے کی متعدد تجاویز کی بھی منظوری دی۔ آئی ایس پی آر کے ایک پریس ریلیز کے مطابق نیشنل کمانڈ اتھارٹی نے پاکستان کے جوہری اثاثوں کے حوالے سے بعض بین الاقوامی ذرائع ابلاغ کی مخالفانہ مہم کا نوٹس لیتے ہوئے اس امر کا اعادہ کیا کہ پاکستان کے جوہری اثاثوں کی سیکورٹی فول پروف ہے۔ اتھارٹی نے غیر ذمہ دارانہ خوف و ہراس پیدا کرنے والوں کو محتاط رہنے کا مشورہ دیا۔ پاکستان اپنے مفادات کے تحفظ کی پوری صلاحیت رکھتا ہے جبکہ اتھارٹی نے کسی غلط مہم جوئی کا تصوّر کرنے والوں کو بھی خبردار کیا۔

__________________