کمپیوٹر مصنوعات بنانے والے ادارے ایپل کے پاس اس وقت امریکی حکومت سے زیادہ نقد رقم موجود ہے۔
امریکی محکمۂ خزانہ کے تازہ ترین اعدادوشمار کے مطابق اس وقت امریکہ میں اخراجات کے لیے موجود نقد رقم تہتر ارب ستر کروڑ ڈالر ہے جبکہ اس کے مقابلے میں ایپل کے حالیہ مالیاتی نتائج کے مطابق کمپنی کے پاس چھہتر ارب چالیس کروڑ امریکی ڈالر نقد رقم کی شکل میں موجود ہیں۔

امریکی حکومت اس وقت اپنی آمدن سے دو سو ارب ڈالر زیادہ کے اخراجات کر رہی ہے جبکہ ایپل نے پچیس جون کو ختم ہونے والی سہ ماہی میں اپنی نیٹ آمدن سات ارب اکتیس کروڑ ڈالر ظاہر کی ہے جو گزشتہ برس کے مقابلے میں ایک سو پچیس فیصد زیادہ ہے۔

اس وقت یہ اندازے لگائے جا رہے ہیں کہ ایپل کمپنی اپنے پاس موجود پچھہتر ارب ڈالر سے زائد رقم کا کیا کرے گی۔ جیوپیٹر ریسرچ کے لیے کام کرنے والے تجزیہ کار ڈینیئل ایش ڈاؤن کا کہنا ہے کہ ایپل اپنے منصوبوں کو بہت خفیہ رکھتی ہے۔

تجزیہ کاروں کا یہ بھی خیال ہے کہ ایپل یہ رقم دیگر کاروباری حریف کمپنیوں کو خریدنے یا ٹیکنالوجی پیٹنٹس کے لیے جمع کر رہی ہے۔

ایش ڈاؤن کے خیال میں بارنز اینڈ نوبل کا آن لائن بک سٹور اور نیٹ فلکس جیسی مووی ویب سائٹ ایپل کا ہدف ہو سکتی ہیں۔

یہ بھی ممکن ہے کہ ایپل ان چھوٹی کمپنیوں کو خرید لے جو آواز کی پہچان جیسے وہ نظام بناتی ہیں جنہیں ایپل کمپنی اپنی ڈیوائسز میں شامل کرنا چاہتی ہے۔

بي بي سي اردو

__________________
بندے اور اللہ تعالی سے محبت کا فرق یہ ہے کہ۔ بندے کی محبت ہمیشہ انسان کی بڑی کمزوری بن جاتی ہے۔ اور اللہ تعالی کی محبت ہمیشہ انسان کی سب سے بڑی طاقت بن جاتی ہے۔