جاسوسی کے الزام میں پکڑے جانے والے بھارتی جاسوس رام پرکاش کو دس سال قید پوری ہونے پر وزارت داخلہ کے احکامات پر کوٹ لکھپت جیل سے رہا کر کے واہگہ بارڈر پر انڈین حکام کے حوالے کر دیا گیا۔ بتایا گیا ہے کہ رام پرکاش کو سیالکوٹ کے سرحدی علاقے سے گرفتار کیا گیا تھا اور اس نے تفتیش میں انکشاف کیا تھا کہ وہ پاکستان میں انڈیا کے لئے جاسوسی کرتا تھا جس پر الزام ثابت ہونے پر اسے دس سال قید کی سزا ہو گئی تھی جو کہ تیس جون کو مکمل ہونے پر آج اسے رہا کر کے رینجرز حکام کے ذریعے انڈین حکام کے حوالے کر دیا گیا۔ رام پرکاش، کشمیر سنگھ کے بعد دوسرا بھارتی جاسوس ہے جو کہ رہا کیا گیا ہے جب کہ انڈیا کی جیلوں میں پانچ سو چورانوے پاکستانی بیگناہ اذیت کی زندگی گزار رہے ہیں مگر ان کو رہائی نہیں مل سکی ان میں اکثر اپنی سزا پوری کر چکے ہیں جب کہ انڈیا کی طرف سے صرف لاشوں کا تحفہ آ رہا ہے۔