صرف ستمبر کے مہینے میں مہنگائی15 فیصد بڑھی اور یہ ہم قیافہ نہیں لگا رہے بلکہ وفاقی ادارہ شماریات کی طرف سے کیے گئے انکشاف کو یہاں نقل کر رہے ہیں ۔ ادارے کے مطابق ابھی مہنگائی مزید بڑھے گی گویا قوم کو آئندہ بھی دکھ ہی دکھ ملیں گے اور ان کی چمڑی اسی طرح ادھیڑی جاتی رہے گی۔
صرف ایک ماہ میں مہنگائی کا پندرہ فیصد تک بڑھ جانا اس امر کا غماض ہے کہ معیشت کے معاملات حکومت کے ہاتھوں سے نکل چکے ہوئے ہیں اور اب ہم آئی ایم ایف کے رحم و کرم پر ہیں جو برسوں پہلے ایک بلائے ناگہانی کی صورت ہمارے ساتھ چمٹا اور ہمارے بدن سے مسلسل خون نچوڑ رہا ہے۔
کبھی کبھی تو لگتا ہے کہ اب کچھ بھی نہیں بچا۔ اب کوئی بچانے کا نعرہ لگاکر آبھی گیا تو نہیں بچا پائے گا کیونکہ56 ارب ڈالرز کے قرضے ' تباہ و برباد معیشت اور اس پر مستزاد امریکہ اور آئی ایم ایف کی غلامی ایسے معاملات ہیں جو کسی سے بھی درست نہیں ہوں گے۔ دیکھیں شائد خدا کو ہم پر رحم آجائے اور وہ غیب سے کوئی ایسا انتظام کر دے کہ قوم کو روز جینے اور مرنے سے نجات مل جائے؟

__________________
جاویداسد