گوجرانوالہ (نمائندہ جنگ) پاکستان مسلم لیگ (ن) کے سربراہ اور سابق وزیر اعظم میاں نوازشریف نے کہا ہے کہ آج اے پی ڈی ایم نے الیکشن لڑنے کا فیصلہ کیا تو پھر 8 جنوری کو عوامی ریفرنڈم ہوگا۔انہوں نے کہا کہ پیپلز پارٹی سے الیکشن بائیکاٹ پر اتفاق نہیں ہو سکا۔انہوں نے کہا کہ اگر اے پی ڈی ایم نے انتخابات میں حصہ لیاتو ق لیگ کو عبرتناک شکست دیں گے۔ایک طرف صدرپرویزکے حامی ق لیگ اور دوسری طرف 16کروڑ عوام ہوں گے۔ پرویز مشرف کو دس مرتبہ وردی سمیت صدر بنانے والے اب کہاں ہیں؟ ملک بچانے اور حکمرانوں سے نجات کیلئے کارکن ڈنڈے کھانے اور جیلوں میں جانے کیلئے تیار ہو جائیں۔ پولیس انتظامیہ اور پوری قوم غیرآئینی حکمرانوں کا حکم ماننے سے انکار کردے۔ نوازشریف نے ان خیالات کا اظہار دس سال بعد گوجرانوالہ آمد پر شیرانوالہ باغ میں ایک بڑے اجتماع سے خطاب کرتے ہوئے کیا۔اس موقع پر سابق صدر محمد رفیق تارڑ بھی موجود تھے۔ نواز شریف نے کہا کہ ہمارا ایک ہی مطالبہ ہے کہ 2 نومبر والے ججوں کو بحال کردیا جائے اس سے پاکستان محفوظ ہو جائے گا مگر بی بی نے کہا کہ عدلیہ کی بحالی نہیں آزادی کی بات کریں اب معاملہ اٹکا ہوا ہے۔ انہوں نے کہا کہ میں طویل عرصہ ملک سے باہر رہا، اس دوران مجھے اہل وطن کی یاد آتی رہی۔انہوں نے کہا کہ آج ق لیگ کے لوگ آپ کے پاس ووٹ مانگنے آئیں گے ان سے سوال کرنا کہ آپ نے ووٹ کیوں لینے ہیں ڈکٹیٹر کے ہاتھ مضبوط کرنے کیلئے، ججوں کو نظربند کرنے کیلئے، ادارے توڑنے کیلئے ووٹ مانگتے ہو۔ انہوں نے کہا کہ ق لیگ کو ووٹ دینا صدر پرویز کو مضبوط کرنا ہے۔حکمران پاکستان کو برباد کررہے ہیں آج مہنگائی دس فیصد بڑھ گئی ہے ججوں کو نظربند کرنا ایک ہزار برس کی تاریخ میں کہیں نظر نہیں آتا۔ حکمرانوں کیخلاف جہاد کا علم بلند کردیا ہے۔ انہوں نے کہا کہ عوام میرا ساتھ دیں مل کر ملک بچائیں گے اور شیر بن کر ملک دشمنوں کا مقابلہ کریں گے۔دریں اثنا امیر جماعت اسلامی پاکستان قاضی حسین احمد اور مسلم لیگ ن کے قائد میاں نوازشریف کے درمیان ہفتے کی صبح میاں نوازشریف کی رہائش گاہ پر ملاقات ہوئی، جس میں دونوں رہنماؤں نے اس بات پر اتفاق کیا کہ انتخابات میں حصہ لینے یا نہ لینے کے بارے میں فیصلہ اے پی ڈی ایم کے پلیٹ فارم پر کیا جائے گا۔ ملاقات کے بعد قاضی حسین احمد نے اخبار نویسوں کو بتایا کہ اے پی ڈی ایم نے اپنے 24 نومبر اور 29 نومبر کے اجلاسوں میں فیصلہ کیا تھا کہ ہمارے مطالبات تسلیم نہ کیے گئے تو انتخابات میں حصہ نہیں لیا جائے گا اور کاغذات نامزدگی 15 دسمبر تک واپس لے لیے جائیں گے

__________________