اسلام آباد (نمائندہ جنگ) آل پارٹیز ڈیمو کریٹک موومنٹ کی دو روزہ قومی کانفرنس نے صدر پرویز مشرف کے استعفیٰ اور عدلیہ کی 2نومبر 2007ء کی پوزیشن کی بحالی کے مطالبہ کا اعادہ کرتے ہوئے دھمکی دی ہے کہ اگر مطالبات تسلیم نہ کئے گئے تو سوال نافرمانی کی تحریکچلائی جائے گی اور پی سی او ججوں کو گھیراؤ کیا جائے گا۔ اے پی ڈی ایم نے مطالبہ کیا کہ پرویز مشرف مستعفی ہوں،ججوں کو بحال کیا جائے جبکہ آئینی پیکیج غیر قانونی اقدام کی توثیق ہوگا۔ جمعرات کو سابق رکن قومی اسمبلی میاں محمد اسلم کی رہائشگاہ پر ہونیوالی دو روزہ قومی کانفرنس کے اختتام پر مشترکہ اعلامیہ جاری کرتے ہوئے اے پی ڈی ایم کے کنونیئر محمود خان اچکزئی نے کہا کہ اگر حکومت نے مطالبات تسلیم نہ کئے تو پھر سول نافرمانی کی تحریک اور پی سی او ججز کا گھیراؤ کرینگے۔ وکلاء سے مشاورت کے بعد جلد ہی لانگ مارچ کا اعلان کرینگے۔ اعلامیہ میں کہا گیا کہ نئی حکومت اعلان بھوربن سے پیچھے ہٹ چکی ہے اور یہ پرویز مشرف کے ساتھ گٹھ جوڑ کرکے ایسے راستوں کی تلاش میں ہے جس سے برطرف ججوں کی بحالی کے معاملے کو محدود اور کنٹرول میں رکھا جا سکے۔ انہوں نے کہا کہ مجوزہ آئینی پیکیج پرویز مشرف کے 3نومبر 2007ء کے غیرآئینی اقدام کو تحفظ دینے اور عدلیہ کی حکومتی اتھارٹی کے سامنے جھکانے کی کوشش ہے۔ حکومت نہ صرف عدلیہ کے بارے میں ڈکٹیٹر کی پالیسیوں کو جاری رکھے ہوئے ہے بلکہ حکومت کے دیگر معاملات میں بھی اسٹیبلشمنٹ کے ایجنڈے پر عمل پیرا ہے۔ بلوچستان میں فوجی آپریشن پورے زورو شور سے جاری ہے  معصوم لوگوں کو جان سے مارا جا رہا ہے  کوہلو اور بگٹی اور دیگر علاقوں کے لوگوں کو مجبور کیا جا رہا ہے کہ وہ اپنے گھروں کو چھوڑ دیں۔ نواب اکبر بگٹی  بالاچ مری اور دیگر افراد کے قتل کی آج تک کوئی تحقیق نہیں کی جاسکی۔ محمود خان اچکزئی نے مطالبہ کیا کہ فیڈریشن کے تمام یونٹس کو مکمل خودمختاری دی جائے اور انکے اقتصادی و قدرتی وسائل پر انکے کنٹرول کو تسلیم کیا جائے۔ سیلز ٹیکس اور کیپٹل گین ٹیکس کی شرح میں کمی کی جائے۔ عوام کی دی جانیوالی تمام مالی مراعات اور سبسڈیز کو بحال کیا جائے۔ روزمرہ استعمال کی اشیاء کی قیمتوں کو کم کیا جائے اور انہیں بڑھنے سے روکا جائے۔ انہوں نے کہا کہ انڈسٹریل ریلیشنز آرڈیننس 2001ء کو منسوخ کیا جائے اور آئی ایل او کے چارٹر کے مطابق کارکنوں کو نوکری کا تحفظ  یونین سازی اور ہڑتال کے حق سمیت دوسرے بنیادی حقوق دیئے جائیں۔ میڈیا پر لاگو تمام پابندیوں کو ختم کیا جائے۔