باجوڑ ایجنسی ........باجوڑ ایجنسی کے صدر مقام خار میں اسکاوٹس کے ہیڈ کوارٹر پر راکٹوں سے حملہ کیا گیا ، جبکہ ایجنسی کے مختلف علاقوں میں نامعلوم افراد کی فائرنگ سے ایک شخص ہلاک ہو گیا۔ ذرائع کے مطابق نا معلوم مسلح افراد نے باجوڑ اسکاوٹس کے ہیڈکوارٹر عنایت قلعہ کا محاصرہ کر کے اس پر راکٹ فائر کئے ۔ باجوڑ اسکاوٹس نے بھی جوابی کارروائی کی جس پر حملہ آور فرار ہو گئے۔ خار کے علاوہ سول کالونی اور عنایت قلعہ کے قریبی علاقوں میں بھی بھاری ہتھیاروں سے فائرنگ کی گئی۔ تحصیل ماموند میں ایک گھر پر راکٹ گرنے سے سرفراز خان نامی شخص ہلاک ہو گیا۔ذرائع کے مطابق گزشتہ کئی روز سے باجوڑ ایجنسی میں امن و امان کی صورت حال خراب ہے جس کے باعث بڑی تعداد میں لوگ محفوظ مقامات کی طرف نقل مکانی کر رہے ہیں ۔