کراچی(رپورٹ:…جاوید رشید) پاکستان میں ایمرجنسی کے تحت میڈیا پر پابندیوں کے خلاف دنیا بھر میں تشویش پائی جاتی ہے۔ بھارتی فلم انڈسٹری (بالی ووڈ) کی ممتاز شخصیات نے بھی اس حوالے سے اپنی تشویش کا اظہار کیا ہے۔ معروف فلمساز مہیش بھٹ نے کہا ہے کہ جیو ٹی وی اور جنگ گروپ کے خلاف حکومتی کارروائی غلط اقدام ہے، جمہوریت کی باتیں کرنے والوں کو زیب نہیں دیتا کہ وہ میڈیا پر قدغن لگائیں۔ انہوں نے کہا کہ جنگ گروپ اردو اخبار کے حوالے سے دنیا کا سب سے بڑا اور مستند ادارہ ہے، پرویز مشرف کو چاہئے کہ وہ اپنے فیصلوں پر نظر ثانی کریں۔ ممتاز کہانی نویس اور شاعر جاوید اختر نے کہا ہے کہ زباں بندی اور تحریر پر جب بندش ہونے لگے تو سمجھ لیجیے کہ اچھے دن آنے والے ہیں، جیو پر پابندی، جنگ کے اشتہارات میں کمی اور صحافت کے خلاف اقدامات سے حکومت کی نیک نامی نہیں ہوسکتی، کہتے ہیں کہ جب حکمرانوں کے برے دن آتے ہیں تو ان کے اقدامات سخت ہوتے جاتے ہیں۔ نامور اداکارہ سائرہ بانو کا کہنا ہے کہ جنگ اخبار اردو کی حفاظت کرنے والا ادارہ ہے، جیو ٹی وی پر پابندیاں لگانا سمجھ سے بالاتر عمل ہے۔ اداکارہ جیہ پرادھا کا کہنا ہے کہ جیو پر پابندی اچھی نہیں ہے۔ اداکار ونود کھنہ کا کہنا ہے کہ میڈیا کو ہر صورت آزاد ہونا چاہئے اور غلط نشریات کی صورت میں قانونی کارروائی ہونی چاہئے، حکمرانوں کی سوچ وسیع ہونی چاہئے۔ فلم ساز اور اداکار سنجے خان اور فیروز خان نے کہا ہے کہ جیو ٹی وی ایک اچھا چینل ہے، یہ ادارہ پاکستان اور بھارت کے درمیان دوستی کے رشتوں کو مضبوط کرنے میں اہم کردار ادا کر رہا ہے اور شاید اسے یہی کرنے کی سزا مل رہی ہے، حکومت پاکستان کو چاہئے کہ وہ خود میں سننے کا حوصلہ پیدا کرے اور میڈیا پر عائد پابندیاں ختم کرے۔ نامور اداکارہ ہیما مالنی کا کہنا ہے کہ میڈیا کی آزادی سے ہی عوام آزاد نظر آتے ہیں، جیو ٹی وی ایک اچھا اور بر صغیر کا ابھرتا ہوا چینل ہے لہٰذا اس پر عائد پابندیاں ختم کی جائیں۔ نامور گلوکار لکی علی نے بھی جیو ٹی وی پر عائد پابندیوں کے خاتمے کا مطالبہ کیا ہے۔ بالی ووڈ کی نامور ہستی دادا بھائی پالکے کے پوتے اور بالی ووڈ کے سرپرست ویرو بھائی پالکے نے کہا ہے کہ میں خود ”انقلاب ممبئی“ میں لکھتا رہا ہوں اور جب لکھنے والوں پر پابندیاں لگتی ہیں تو کہا جاتا ہے کہ کوئی بڑا طوفان آنے والا ہے، حکومت پاکستان میڈیا پر پابندیاں عائد کرنے کی بجائے اس سے دوستانہ تعلقات رکھے۔

__________________