وفاقی حکومت نے بجلی کے گھریلو صارفین کو دی گئی جی ایس ٹی سب سڈی کی رعایت واپس لے لی ہے اور یکم جولائی سے بجلی کی قیمت میں 16فیصد اضافہ ہو گیا ہے۔ ذرائع کے مطابق بجلی کے بلوں پر پہلے سے 15 فیصد جی ایس ٹی ( جنرل سیلز ٹیکس) عائد تھا لیکن صرف کمرشل اور صنعتی صارفین اس کی ادائیگی کرتے تھے، گھریلو صارفین کے بلوں پر بھی جی ایس ٹی لگا یاجاتا تھا لیکن اس کی ادائیگی وفاقی حکومت سبسڈی کی صورت میں کرتی تھی، یکم جولائی سے وفاقی حکومت نے سبسڈی دینے سے انکار کر دیا ہے اور اب واپڈا گھریلو صارفین سے بلوں میں یہ جی ایس ٹی 16 فیصد کی شرح سے وصول کرے گا، اس کا اطلاق یکم جولائی سے ہوگا ۔

50یونٹ تک خرچ کرنے والے گھریلو صارفین اس سے مستثنیٰ قرار دیئے گئے ہیں اس وقت بجلی کے گھریلو صارفین کی تعداد 12.6ملین ہے، جس میں سے 4.7ملین ایسے ہیں جو 50یونٹ خرچ کرتے ہیں۔ بجلی کے صارفین نے جی ایس ٹی لگانے پر شدید احتجاج کرتے ہوئے وزیراعظم یوسف رضا گیلانی سے مطالبہ کیا ہے کہ یہ فیصلہ واپس لیا جائے۔ صارفین کا موقف ہے کہ مہنگائی نے پہلے ہی عوام کا جینا دو بھر کر دیا ہے، پٹرول اور گیس کی قیمتوں میں پہلے ہی اضافہ کیا جا چکا ہے اب بجلی کی قیمت میں اضافہ کے بعد عام آدمی کیلئے گزر اوقات کرنا مشکل بلکہ نا ممکن ہوجائے گا۔

القمر آں لائن کے مطابق وفاقی حکومت کے ذرائع کا کہناہے کہ جی ایس ٹی کی سب سڈی عالمی مالیاتی اداروں کے دباؤ پر واپس لی گئی ہے۔ دریں اثناء ابھی واپڈا کمپنیوں نے بجلی کے ٹیرف میں 20 فیصد اضافہ کیلئے نیپرا کے پاس پٹیشن جمع کرائی ہوئی ہے جس کی سماعت 11جولائی کو ہو گی۔

پٹرول اور گیس کی قیمتوں میں اضافہ کیساتھ ہی کھانے پینے کی اشیاء کی قیمتوں میں اضافہ ہوگیا ہے اور دُکانداروں نے من مانے نرخ مقرر کردیئے ہیں۔ القمر آن لائن کی طرف سے وفاقی دارالحکومت میں آبپارہ مارکیٹ، میلوڈی مارکیٹ اورستارہ مارکیٹ میں سروے کیا گیا تو بیشتر دُکانداروں نے نرخ آویزاں نہیں کئے ہوئے تھے وفاقی دارالحکومت کی ضلعی پرائس کنٹرول کمیٹی بھی غیر مٴوثر نظر آرہی ہے۔ ضلعی انتظامیہ کی طرف سے قیمتوں کے حوالے سے منڈی اور مارکیٹ کے نرخ جاری کئے جاتے تھے مگر آج کل یہ سلسلہ بند ہے۔

مہنگائی نے پاکستان کے عوام کو حواس باختہ کر کے رکھ دیا ہیض، عوام کو اس سے غرض نہیں رہی کہ سرحدوں پر نیٹو فورسز کیا کر رہی ہیں یا فاٹا میں آپریشن کیوں ہو رہا ہے، صدر کا مواخذہ ہونا چاہئے یا نہیں، ججوں کی معزولی کے بعد جج بحال ہونگے یا نہیں، حکومت برقرار رہے گی یا نہیں، ملک میں کیا ہو رہا ہے، کیوں ہو رہا ہے، بحران کیسے حل ہونگے؟ ترقی کس طرح ہو گی،قوم تمام مسائل سے لاتعلق ہو کر صرف روٹی کی فکر میں غرق ہو گئی ہے،اب تو مریضوں نے ڈاکٹرو ں سے فیس میں رعایت کی درخواستیں کرنا شروع کر دی ہیں اور وہ ذہنی مریض بن گئے ہیں، وہ سوچتے ہیں ان کا بچہ بیمار ہو گیا تو ڈاکٹر کی فیس اور دوا کے پیسے کہاں سے آئیں گے، گھر کا خرچہ کیسے چلے گا، ان کا پیٹ کیسے بھرے گا، بجلی، پانی، گیس کے بل کیسے ادا ہونگے؟ بچوں کی پڑھائی کیلئے پیسے کہاں سے آئیں گے،

عوام نفسیاتی مریض بن کر رہ گئے ہیں، دو اور دو چار روٹیاں کبھی مذاق تھا اب حقیقت بن گیا ہے، گھر کی دال روٹی پوری کرنے کیلئے ایک عام آدمی کا کام کرنے کا وقت 8 گھنٹے سے بڑھ کر 19 سے 20 گھنٹے ہو گیا ہے مگر روٹی پھر بھی پوری نہیں ہوتی۔ مہنگائی نے لوگوں کو قدرت کی نعمتوں سے بھی دور کر دیا ہے۔ لوگوں میں موسمی پھل خریدنے کی بھی سکت نہیں رہی، عوام کی اکثریت آم، آڑو، خوبانی، آلو بخارا، تربوز کا ذائقہ بھی بھول چکی ہے۔ پھل پہنچ سے باہر اور پیٹ بھر کر روٹی میسر نہ ہونے کے باعث لوگوں میں غذائی قلت بھی متعدد بیماریوں کاباعث بن رہی ہے مگر ان بیماریوں کے علاج کیلئے بھی لوگوں کے پاس پیسے نہیں۔ فیکٹری کے مالک سے موٹر سائیکل رکشہ چلانے والے تک ہر شخص مہنگائی سے پریشان ہے۔