نیشنل الیکٹرک پاور اینڈ ریگولیٹری اتھارٹی (نیپرا) نے بجلی کی مختلف پیداواری کمپنیوں کے نرخوں میں 7سے 52پیسے فی یونٹ اضافے کی منظوری دے دی ہے۔
یہ بات سمجھ سے بالاتر ہے کہ ایک عوامی حکومت کے دور میں عوام کے مسائل میں کمی لانے کی بجائے وہ اقدامات کئے جارہے ہیں جس سے غریب آدمی تن کے کپڑے 'پیٹ کے لئے روٹی اور سر چھپانے کے لئے سائبان سے محروم ہوتا جارہا ہے۔ لیکن حیرت ہے کہ روٹی' کپڑا اور مکان کے نام پر منتخب ہونے والی حکومت عوام کو ترپٹا ہوا دیکھ کر خاموش ہے ' نیپرا ہو یا اوگرا ہو ان اداروں کو مکمل اختیار دیا گیا ہے کہ جب چاہیں جیسے چاہیں عوام کا خون نچوڑ کر سرکاری خزانے میں اضافہ کیا جائے۔ سوال یہ ہے کہ کیا حکومت کو اس بات کی خبر نہیں کہ لوگ بجلی اور گیس کے بھاری بلوں سے عاجز آکر خودکشیاں کر رہے ہیں اور اگر بجلی و گیس کے بل ادا بھی کرتے ہیں تو اپنے بچوں کے پیٹ کاٹ کر اور اپنے ارمانوں کا خون کرکے' ہماری حکمرانوں اور تمام سیاستدانوں سے گزارش ہے کہ خدا را عوام کی حالت زار کو دیکھتے ہوئے کچھ تو رحم کریں۔ اب تو نوبت یہ ہے کہ دو وقت کی روتی تو درکنار ایک وقت کی روٹی کے لئے بھی لوگ ترس رہے ہیں۔ اب یہ سلسلہ ختم کریں اور سرکاری اخراجات پورے کرنے کے لئے ان لوگوں کے خلاف شکنجا کسا جائے جو ٹیکس چوری کرتے ہیں' ملکی دولٹ لوٹ کر فرار ہو جاتے ہیں' بینکوں سے قرضے معاف کراکے عیاشیاں کرتے ہیں۔ حکومتی اخراجات کم کریں ۔ عوام کو اگر ریلیف نہیں دے سکتے تو کم از کم اب اتنی گنجائش تو باقی رہنے دیں کہ زندہ تو رہ سکیں۔
ضرورت اس امر کی ہے کہ حکومت عوام کو ریلیف فراہم کرنے کے لئے عملی اقدامات کرے اور اپنے نعروں کو سچ ثابت کرے۔

__________________
جاویداسد