حکومت نے دسمبر سے مارچ تک بجلی فرنس آئیل سے پیدا کرنے کی حکمت عملی اختیار کی ہے کیونکہ اس عرصے میں پیداواری یونٹ گیس پر نہیں چلائے جاسکیں گے۔ اس حوالے سے گمان اغلب ہے کہ بجلی کی قیمتوں میں15سے 20 فیصد اضافہ کر دیا جائے گا اور یوں عوام پر اچانک ایک بہت بڑا دبائو پڑ جائے گا۔ وہ لوگ جو پہلے ہی دبائو میں ہیں اور موجودہ نرخوں پر بھی بجلی خریدنے کی سکت سے محروم ہیں وہ اس نئے بوجھ تلے بری طرح دب جائیں گے۔
اس میں شک نہیں کہ فرنس آئیل کے ذریعے بجلی پیدا کرنا اس عرصے میں حکومت کی مجبوری ہے کیونکہ اس کی ذمہ داری ہے کہ جیسے بھی بن پڑے عوام کو بجلی فراہم کی جائے لیکن حکومت کا ایک فرض یہ بھی تو ہے کہ عوام کے معاشی حالات کو سامنے رکھ کر یہ دیکھے کہ دسمبر تا مارچ جتنے بھاری بھر کم بل عوام کو موصول ہوں گے ، اٹھارہ کروڑ کی آبادی میں کتنے لوگ ہوں گے جو اتنی مہنگی بجلی خرید سکیں گے؟
ہم سمجھتے ہیں کہ ہر دبائو کو عوام کی طرف منتقل کر دینا اور انہیں ایک کے بعد دوسرے امتحان میں ڈالنا دانشمندی نہیں ہے کیونکہ عوامی برداشت جواب دے گئی تو حکومت کے اپنے دن گنے جائیں گے ہماری تجویز یہ ہے کہ اس معاملے پر ازسر نو غور کیاجائے اور ایسا قابل عمل حل ڈھونڈا جائے جس سے عوام کی جیبوں پر مزید دبائو نہ پڑے۔

__________________
اے ایمان والو اللّٰہ سے ڈرو اور اسکی طرف وسیلہ ڈھونڈو (جس کی بدولت تمہیں اس کا قُرب حاصل ہو ) اور اس کی راہ میں جہاد کرو اس امید پر کہ فلاح پاؤ (المائدہ 35)