واشنگٹن................امریکی صدرجارج ڈبلیو بش نے کہا ہے کہ انہیں پاکستان میں جمہوریت کی بحالی سے متعلق صدرجنرل پرویزمشرف کے وعدوں پر اعتبار ہے اور انہوں نے ان حدود کو پار نہیں کیا کہ وہ واشنگٹن کی حمایت سے محروم ہوجائیں۔واشنگٹن میں امریکی ٹی وی کو انٹرویو میں صدر بش نے کہا کہ پاکستان میں ایمرجنسی کے نفاذ کے بعد گرفتار کئے گئے افراد کی رہائی مثبت اشارہ ہے۔ان کا کہنا تھا کہ انہیں پاکستان میں ایمرجنسی کے نفاذ پر خوشی نہیں تاہم وہ جانتے ہیں کہ جنرل مشرف انتہاپسندی کے خلاف جنگ میں کتنے اہم ہیں اور انہیں پختہ یقین ہے کہ جنرل مشرف پاکستان کو جمہوریت کی راہ پر واپس لے آئیں گے۔انہوں نے ایک بار پھر مطالبہ کیا کہ صدر جنرل پرویز مشرف ملک میں ایمرجنسی کا خاتمہ اور انتخابات کا جلد انعقاد کریں اور سویلین صدر کی حیثیت سے ذمہ داریاں نبھانے سے قبل آرمی چیف کا عہدہ چھوڑ دیں۔ صدر بش نے کہا کہ انہوں نے صدرجنرل پرویز کو لفظوں کا پاس کرنے والا شخص پایا ہے ،ان کے خیال میں جنرل مشرف جمہوریت پر یقین رکھنے والے شخص ہیں ۔ایک سوال پر صدر بش نے کہا کہ پاکستان کے جوہری اثاثے غلط ہاتھوں میں جانے کا امکان نہیں اور نہ ہی انہیں اس معاملے پر کوئی تشویش ہے ۔

__________________