برصغیر پہلی بولتی فلم ’عالم آرا‘ کی گم شدگی

بھارتی حکومت نے ملک کی فلم انڈسٹری کے تمام فلم سازوں سے کہا ہے کہ وہ اپنی فلم کی ایک کاپی نیشنل آرکائیوزآف انڈیا میں محفوظ رکھنے کے لیے جمع کروائیں ۔ حکومت کے اِس فیصلے کی وجہ ہے فلم ساز اردشیر ایرانی کی 1931ء میں ریلیز ہونے والی برِ صغیر کی پہلی بولتی فلم عالم آرا کے پرنٹس کی گم شدگی ۔ بھارت سمیت دنیا کے کسی بھی فلمی کتب خانے میں عالم آرا فلم کے پرنٹس موجود نہیں ہیں ۔

چھ سال قبل پونہ شہر کے نیشنل آرکائیوس آف انڈیا میں آتشزدگی کے باعث فلم عالم آرا کے پرنٹس جل کر راکھ ہو گئے تھے ۔ اب محض کچھ تصویریں اور تھوڑا بہت تشہیری مواد ہی اِس لاجواب کلاسک رومانٹک فلم کی یاد کے طور پرحکومت کے پاس موجود ہے ۔ اور شاید اسی واقعے سے سبق لیتے ہوئے اب حکومت نے اعلان کیا ہے کہ بھارت کے تمام فلم ساز اپنی فلموں کی ایک ایک کاپی نیشنل آرکائیوز آف انڈیا میں ریکارڈ کے لیے جمع کروائیں ۔

فلم ماہرین کے مطابق بھارت میں خاموش فلموں کے دور کو ختم کرکے فلم سازی کی دنیا میں آواز کے استعمال کےذریعے نیا انقلاب برپا کرنے والی فلم عالم آرا کے پرنٹس ہمیشہ کے لیے گم ہوجانا بھارت کی آنے والی نسل کے لیے بہت بڑا نقصان ہے جس کی تلافی ممکن نہیں ۔ انفارمیشن اینڈ براڈکاسٹینگ منسٹری کے ذریعے دی گئی معلومات کے مطابق نیشنل آرکائیوس آف انڈیا میں مزید نئے وارڈ ز کی تعمیر کی جا رہی ہے تاکہ 96 سال پرانی کلاسک فلموں کے ساتھ نئی ریلیز فلموں کو بھی محفوظ رکھا جاسکے ۔

پارسی پلے رائٹر جوزف ڈیوڈ کی کہانی پر مبنی فلم عالم آرا ایک شہزادے اور خانہ بدوش لڑکی کی محبت کی کہانی ہے ۔ 14 مارچ 1931ء میں ممبئی کے جیسٹک سنیما میں ریلیز ہوئی یہ فلم بھارتی فلموں کی تاریخ میں سنگِ میل ثابت ہوئی تھی۔

__________________
سمجھو تو بہت قابلِ تعظیم ہے لوگوں
اِک دوست کا اِک دوست سے پیار کا رشتہ
www.tariqraheel.blogspot.com