برما کی فوجی جنتا نے سمندری طوفان نرگس کے سترہ روز بعد تین روزہ سوگ کا اعلان کیا ہے۔
برما کے سرکاری ٹیلیویژن کے مطابق منگل سے تین روز کے لیے برما کا پرچم سرنگوں رہے گا۔ ایک بیان میں کہا گیا ہے ’سائیکلون نرگس سے بڑے پیمانے پر ہلاکتوں کے پیش نظر حکومت تین روزہ سوگ کا اعلان کرتی ہے اور اس دوران پرچم سرنگوں رہے گا۔‘

یہ اعلان ایسے وقت کیا گیا ہے جب برما کے ہمسایہ ملک چین میں بھی تین روزہ سوگ منایا جا رہا ہے جہاں زلزلے سے بے شمار ہلاکتیں ہوئی ہیں۔

بی بی سی کے جوناتھن ہیڈ کے مطابق برما ابھی تک امریکی، برطانوی اور فرنسیسی مدد قبول کرنے سے انکار کرتا آیا ہے مگر اب اس کے موقف میں نرمی آ رہی ہے۔

واضح رہے کہ غیر ملکی امداد سے انکار کرنے پر برما کی حکومت کی عالمی برادری نے سخت الفاظ میں مذمت کی تھی۔ اقوام متحدہ نے کہا تھا کہ برما کی حکومت سمندری طوفان سے متاثرہ افراد کے لیے غیر ملکی امداد قبول نہ کر کے انسانیت کے خلاف جرم کرنے جا رہی ہے۔

__________________