بروسلاف کے سابق کونسلر اسحق خان کو بھی انتخابی دھاندلی پر چارج کیا گیا
لندن(جنگ نیوز) برو سلاف کے سابق کونسلر اسحق خان کو بھی انتخابات میں دھاندلی کے الزام کے تحت چارج کیا گیا۔ ان کے چار دیگر ساتھیوں 30سالہ الطاف خان، 52سالہ ارشد محمود راجہ، 45سالہ بشارت خان اور 19سالہ ممتاز کو عدالت نے اسی الزام کے تحت جمعے کو چارج کیا تھا۔ گزشتہ مہینے خصوصی طور پر بلائے گئے الیکشن کورٹ کو معلوم ہواتھا کہ مئی 2007کے انتخابات میں51سالہ اسحق خان نے دھاندلی کی تھی۔ سلاف میں عدالت کو بتایا گیا کہ اسحق خان کے ساتھیوں نے پوسٹل ووٹوں میں دھاندلی کی تھی ۔ اس کے بعد ملزم کو کنزرویٹوپارٹی سے نکال دیا گیا ۔ لیبر پارٹی کی لیڈیا سائمنزاسحق خان سے سینڑل وارڈ سیٹ ہار گئی تھیں جوگزشتہ 23سال سے ان کے پاس تھی۔ تمام ملزمان کو عوامی نمائندگی کے ایکٹ 1983کے سیکشن 60اور62اے کے تخت چارج کیا گیا ہے۔ پانچوں ملزمان کی ضمانت منظور کی گئی ہے اور نہیں 15اپریل کو میڈن ہیڈ مجسٹریٹس کورٹ میں پیش ہونے کا حکم دیا گیا ہے۔

__________________