راولپنڈی ۔۔۔۔۔۔۔۔ برطانوی تحقیقاتی ادارے اسکاٹ لینڈ یارڈ کی تفتیشی ٹیم نے راولپنڈی کے ڈسٹرکٹ ہیڈکوارٹر اسپتال کے مردہ خانے کا دورہ کرکے خود کش دھماکے کے بعد ملنے والے انسانی اعضاء کا تجزیہ کیا۔ ٹیم نے راولپنڈی جنرل اسپتال میں آپریشن تھیٹر کا بھی معائنہ کیا اور ڈاکٹروں سے بے نظیر بھٹو کے آنے اور علاج کے حوالے سے مختلف سوالات کئے۔ تین گھنٹے باریک بینی سے تحقیقات کے بعد ٹیم اسلام آباد واپس روانہ ہو گئی۔ تفصیلات کے مطابق اتوار کو برطانوی تحقیقاتی ادارے اسکاٹ لینڈ یارڈ کے ماہرین اور دھماکا خیز مواد کے ماہرین پر مشتمل ٹیم کو راولپنڈی پولیس انیکسی پہنچنے کے بعد حکومت پنجاب کی چار رکنی تحقیقاتی ٹیم، ڈی آئی جی راولپنڈی، ایس ایس پی آپریشنز، ایس پی راول ٹاؤن، اے ایس پی، اور پولیس کے مسلح کمانڈوز کی درجنوں گاڑیوں کے حصار میں راولپنڈی لیاقت باغ لایا گیا۔ برطانوی تحقیقاتی ٹیم نے جائے وقوعہ کی جدید آلات سے چیکنگ کی اور برطانوی سفارتخانے کی گاڑی جائے وقوعہ پر کھڑی کرکے مختلف زوایے سے تحقیقات کی اور پیپلز پارٹی راولپنڈی سٹی کے دفتر کی چھت پر کھڑے ہو کر ویڈیو فوٹیج اور تصاویر بنائیں۔ علاوہ ازیں اس ٹیم نے بے نظیر بھٹو کے سن روف پر کھڑے ہونے، فائرنگ اور خود کش حملے کے دورانیہ کے مطابق عملی مظاہرہ کیا۔ بعد ازاں تحقیقاتی ٹیم اچانک راولپنڈی جنرل اسپتال پہنچ گئی جہاں برطانوی ٹیم نے آپریشن تھیٹر، جہاں بے نظیر بھٹو کو آخری وقت میں طبی امداد دی گئی، کا باریک بینی سے جائزہ لیا اور وہاں پر موجود ڈاکٹرز سے مختلف سوالات کئے۔ ذرائع نے بتایا کہ برطانوی ٹیم نے ڈاکٹروں سے پوچھا کہ بے نظیر بھٹو کو جب اسپتال لایا گیا تو ان کی حالت کیسی تھی جس پر ڈاکٹروں نے بتایا کہ بے نظیر بھٹو کو جب اسپتال لایا گیا تو ان کی سانس اور نبض حرکت چھوڑ چکی تھی تاہم ڈاکٹروں نے ان کی زندگی بچانے کی سرتوڑ کوشش کی مگر وہ جانبر نہ ہو سکیں اور خالق حقیقی سے جا ملیں۔ ذرائع کے مطابق برطانوی ٹیم نے بے نظیر بھٹو کے جسم پر لگنے والے زخموں کے بارے میں پوچھا تو ڈاکٹروں نے انہیں اس حوالہ سے تفصیلی بریفنگ دی۔ اس کے بعد برطانوی تحقیقاتی ٹیم واپس جائے وقوعہ پر پہنچی اور اسٹیج سے لے کر بے نظیر بھٹو کے گاڑی میں بیٹھنے تک کے عمل اور اس کے اردگرد سیکورٹی کے حوالہ سے پولیس حکام سے مختلف سوالات کئے۔