راولپنڈی ۔۔۔۔۔۔۔صدرپرویز مشرف نے برطانوی فورینزک ماہرین سے کہاہے کہ اپوزیشن لیڈ ر بینظیر بھٹوکے قتل کااحاطہ کرنے والے حالات کی تفتیش کیلئے انہیں مکمل آزادی ہوگی،انہوں نے کہاکہ محترمہ کی شہادت ایک قومی سانحہ ہے اور ابھی تک قوم صدمے کا شکار ہے۔ ان کو قتل کرکے پاکستان کو عدم استحکام کا شکار کرنے کی گہری سازش کی گئی۔ امید ہے کہ پیپلزپارٹی بھی اس معاملے میں تعاون کرے گی، وزارت خارجہ کے ترجمان جاوید اقبال چیمہ کے مطابق صدرنے تفتیش کرنے والے ماہرین کواپنی بھر پورحمایت کایقین د لا یا اورکہاکہ وہ اپنی تفتیش کرنے کیلئے مکمل طورپرآزادہیں اوران کے معاملات میں کوئی بھی مداخلت نہیں کریگاجبکہ برطانوی ٹیم نے کہاہے کہ وہ اس المناک واقعہ سے متعلق حقائق کا پتہ چلانے کیلئے شواہد کی تفصیلی چھان بین کر رہی ہے۔ ٹیم نے تحقیقات میں حاصل تعاون اور معاونت کو سراہا اورکہاکہ ان کی کوشش ہے کہ اسی ماہ اپنا کام مکمل کرکے رپورٹ دیدیں۔منگل کو یہاں اپنے کیمپ آفس میں اسکاٹ لینڈ یارڈ کی تحقیقاتی ٹیم سے گفتگو کرتے ہوئے صدرنے یقین دلایا کہ ا سکاٹ لینڈ یارڈ کی ٹیم کو بے نظیر بھٹو قتل کیس کی تفتیش کے لئے تمام وسائل فراہم کئے جائیں گے کیونکہ حکومت اس قتل کی غیر جانبدارانہ تحقیقات کے عزم پر قائم ہے تاکہ قوم کے سامنے اصل حقائق آ سکیں،انہوں نے کہاکہ محترمہ کی موت کی وجوہات میں سر میں گولی لگنا بھی ہوسکتاہے تاہم اگر ہر پہلو کو سامنے رکھا جائے تو پھر بہتر نتائج سامنے آسکتے ہیں۔ صدر مشرف نے بتایاکہ محترمہ بے نظیر بھٹو کو فول پروف سیکیورٹی فراہم کی گئی تھی اور ان کی سیکیورٹی پر ان کی مرضی اور اعتماد کے لوگ تعینات تھے۔ ان کی شہادت کے موقع پر پولیس والوں نے بھی جام شہادت نوش کیا جوکہ اس وقت سیکیورٹی فرائض انجام دے رہے تھے۔ محترمہ اگر سن روف سے باہر نہ آتیں تو بچ جاتیں تاہم یہ افسوس ناک سانحہ پاکستان اور خود ان کیلئے انتہائی صدمے کا باعث ہے ۔صدرنے اسکاٹ لینڈ یارڈ کی ٹیم کو یقین دلایا کہ دوران تحقیقات وہ آزادی کے ساتھ غیر جانبدارانہ انداز میں تحقیقات مکمل کریں۔ حکومت کوئی مداخلت نہیں کرے گی کیونکہ وہ خود بھی جاننا چاہتے ہیں کہ محترمہ بے نظیر بھٹو کے قتل کے پیچھے کون سے عناصر کارفرما ہیں۔ حقائق عوام کے سامنے آنے چاہئیں۔ صدر پرویز مشرف نے کہا ہے کہ حکومت شواہد کا کھوج لگا کر محترمہ بینظیر بھٹو کے قتل کے حقائق تلاش کرنے اور مرتکب عناصر کو انصاف کے کٹہرے میں لانے کیلئے پر عزم ہے، انہوں نے کہاکہ جو ریکارڈ ویڈیو فوٹیج‘ سیکیورٹی امور اور دیگر دستاویزات اسکاٹ لینڈ یارڈ کی ٹیم کو چاہئے ہونگی وہ دی جائیں گی۔ صدر نے انہیں تمام تحقیقاتی اداروں کے مکمل تعاون کا یقین دلایا۔ صدر نے امید ظاہر کی کہ اسکاٹ لینڈ یارڈ کے تکنیکی اور فورینز ماہرین اپنے پاکستانی ہم منصبوں کی طرف سے کی جانے والی تحقیقاتی کوششوں میں معاون ہوں گے۔ صدر نے پاکستان کی طرف سے معاونت کی درخواست پر فوری ردعمل کا اظہار کرنے پر برطانوی حکومت کا شکریہ بھی اداکیا۔ ملاقات میں تحقیقاتی ٹیم نے سانحہ راولپنڈی کی تحقیقات کے بارے میں تبادلہ خیال کیا ۔ ٹیم نے صدر پرویز کو اب تک کی گئی تحقیقات پر بریفنگ دی۔ ٹیم کے ساتھ پاکستان میں متعین برطانوی ہائی کمشنر رابرٹ برنکلے بھی موجود تھے۔ ٹیم نے ملاقات کاوقت دینے پرصدر مملکت کاشکریہ ادا کیا ۔ٹیم کی طرف سے صدر پرویز مشرف کو بتایاگیاکہ اس اہم سانحہ کی تحقیقات کے دوران تمام پہلوؤں اور امکانات کو سامنے رکھ رہے ہیں۔جیو کے مطابق اسکاٹ لینڈ یارڈ ٹیم کے ساتھ برطانوی ہائی کمشنر رابرٹ برنکلے بھی موجود تھے جنہوں نے صدر پرویز مشرف کو ٹیم کے ارکان کا تعارف کرایا۔برطانوی نشریاتی ادارے کے مطابق برطانوی ہائی کمیشن نے اس ملاقات کی تصدیق کی تاہم کوئی تفصیلات نہیں بتائیں۔