کراچی ۔۔۔۔۔۔۔ پاکستان پیپلزپارٹی کے بانی چیئرمین ذوالفقار علی بھٹو کے نواسے، سابق وزیراعظم محترمہ بینظیر بھٹو شہید کے صاحبزادے اور پی پی کے نومنتخب چیئرمین بلاول بھٹو زرداری نے منگل کو لندن میں پریس کانفرنس کے دوران پراعتماد لہجے میں سوالات کے جواب دے کر سب کو حیران کر دیا۔ برطانیہ کی آکسفورڈ یونیورسٹی میں زیرتعلیم 19 سالہ بلاول بھٹو کی یہ پہلی باضابطہ پریس کانفرنس تھی جس میں دُنیا بھر کے الیکٹرانک و پرنٹ میڈیا کے صحافی موجود تھے۔ پریس کانفرنس کے آغاز پر بلاول بھٹو نے انگریزی میں لکھی ہوئی تقریر بڑے اطمینان و سکون کے ساتھ پڑھی پھر جب سوال جواب شروع ہوئے تو ان کا لہجہ دیدنی تھا۔ غیرملکی صحافیوں کے ہر سوال کے پیچھے چھپے دو دو تین تین سوالات کے جواب انہوں نے بہت ڈپلومیٹک انداز میں نہایت اعتماد کے ساتھ شستہ انگریزی میں دیئے اور بعض سوالات کے بڑے فرینک جواب دیئے۔ سوال کرنے والے ہر صحافی کو بلاول نے بہت اچھے انداز میں پوری طرح مطمئن کیا۔ پریس کانفرنس میں شریک غیرملکی صحافیوں نے پاکستان کی سیاست میں بھٹو فیملی کی نئی نسل کی اس انداز میں آمد پر بے حد خوشی کا اظہار کیا۔ ٹیلی ویژن پر پریس کانفرنس دیکھنے والے لوگوں نے بھی بلاول بھٹو زرداری کے پراعتماد لہجے کا خصوصی طور پر ذکر کیا اور ان کی تعریف و توصیف کی۔ اُن کا کہنا تھاکہ بلاول کو بولتا دیکھ کر انہیں ذوالفقار علی بھٹو اور بینظیر بھٹو یاد آ گئے۔ پتہ چلا ہے کہ پیپلزپارٹی کے شریک چیئرمین آصف زرداری جب دو روز قبل بلاول بھٹو زرداری کو آکسفورڈ کیلئے رُخصت کرنے دبئی گئے تھے تو انہوں نے بلاول کو اس پریس کانفرنس کیلئے اچھی طرح تیار کیا تھا اور اس حوالے سے ان پر محنت بھی کی تھی۔ لندن میں پاکستان کے سابق ہائی کمشنر واجد شمس الحسن جو اس پریس کانفرنس میں موجود تھے انہوں نے بھی بلاول بھٹو کو اس سلسلے میں تیاری کرائی تھی۔ بلاول نے اپنے نانا ذوالفقار علی بھٹو اور والدہ بینظیر بھٹو کے انداز میں پراعتماد لہجے سے ہر ایک کو متاثر کیا۔