بلوچستان میں فوج کے منصوبے

اعجاز مہر
بی بی سی اردو ڈاٹ کام، کوئٹہ

’جنرل کیانی فنِ خطابت میں بھی کسی سیاستدان سے کم نہیں‘

پاکستان کے مصیبت زدہ صوبے بلوچستان میں ویسے تو بی بی سی کی کوریج کے سلسلے میں سنہ دو ہزار پانچ سے اب تک کئی بار جانا ہوا ہے لیکن اب کی بار پہلی مرتبہ افواج پاکستان کے شعبہ تعلقات عامہ کے خرچے پر جانے کا موقع ملا۔

کوئٹہ پہنچ کر پتہ چلا کہ انہیں اپنے منصوبوں کی کوریج کرانی ہے۔ ایک تو انہوں نے ’گیریژن سپورٹس کمپلیکس‘ تعمیر کیا ہے جو کہ بقول فوجی افسران کے بلوچستان کے نوجوانوں کو معیاری کھیل کود کی سہولیات فراہم کرے گا تاکہ وہ شدت پسندی سمیت دیگر غیر ضروری سرگرمیوں سے دور رہیں۔

جب سپورٹس کپلیکس میں باکسنگ، ویٹ لفٹنگ، کراٹے اور دیگر ’ان ڈور گیمز‘ کے کھلاڑیوں سے بات کی تو معلوم ہوا کہ بیشتر کھلاڑی ہزارہ کمیونٹی کے ہیں، کچھ پنجابی اور پشتون ہیں جبکہ بلوچ نوجوانوں کی تعداد تو آٹے میں نمک کے برابر بھی نہیں۔

سپورٹس کمپلیکس میں باکسنگ، ویٹ لفٹنگ، کراٹے اور دیگر ’ان ڈور گیمز‘ کے کھلاڑیوں سے بات کی تو معلوم ہوا کہ بیشتر کھلاڑی ہزارہ کمیونٹی کے ہیں، کچھ پنجابی اور پشتون ہیں جبکہ بلوچ نوجوانوں کی تعداد تو آٹے میں نمک کے برابر بھی نہیں۔
میں نے سوچا کہ بلوچستان کی شدت پسندی میں تو بلوچ نوجوان ہیں اور کور کمانڈر کوئٹہ نے جو ذکر کیا کہ اس منصوبے کا مقصد شدت پسندی جیسی سرگرمیوں سے نوجوانوں کو دور رکھنا ہے تو وہ تو بظاہر پورا ہوتا نظر نہیں آتا۔

ہاں البتہ یہ ضرور ہے کہ چھاؤنی اور شہر کے سنگم پر واقع یہ سپورٹس کمپلیکس کوئٹہ کے نوجوانوں کی تفریح اور کھیل کود میں نام پیدا کرنے کی ایک نرسری ضرور ثابت ہوسکتا ہے۔ لیکن اس ادارے کو چلانے کے لیے جو بورڈ بنایا گیا ہے اس میں تو نوے فیصد سے زیادہ اعلیٰ فوجی افسران شامل ہیں اور عام لوگوں کی رسائی کا طریقہ کار، فیس اور دیگر قوائد وغیرہ جب بنے تو پھر ہی کچھ کہا جاسکتا ہے۔

دوسرا منصوبہ ہے ’کوئٹہ انسٹی ٹیوٹ آف میڈیکل سائنسز‘ کا۔ جس میں بھی چھاؤنی کے نزد زمین فوج نے دی ہے جبکہ تعمیراتی کام میں بلوچستان حکومت نے بھی فنڈ دیے ہیں۔ جس طرح بتایا گیا کہ اس کے پرنسپل اور تدریسی یا غیر تدریسی عملہ فوج ہی مقرر کرے گی تو یقیناً اس سے معیاری تعلیم تو ملے گی اور بلوچستان کے نوجوانوں کو آگے آنے کے مواقع بھی میسر ہوں گے۔

لیکن اس پر مجھے مرحوم اکبر بگٹی کی وہ بات یاد آئی جو انہوں نے فروری سنہ دو ہزار چھ میں روپوشی کے دنوں میں سنگسیلا کے پہاڑوں میں انٹرویو کے دوران کہی تھی کہ ’ایف سی (فرنٹیئر کور) والوں نے جو ڈیرہ بگٹی میں سکول قائم کیا ہے وہ فوجیوں کی بیویوں اور بہنوں کو نوکریاں دینے کے لیے کھولے ہیں۔‘

چھاؤنی اور شہر کے سنگم پر واقع یہ سپورٹس کمپلیکس کوئٹہ کے نوجوانوں کی تفریح اور کھیل کود میں نام پیدا کرنے کی ایک نرسری ضرور ثابت ہوسکتا ہے
اس بات پر میری بگٹی صاحب سے کافی بحث ہوئی تھی کہ چلیں فوجیوں کی بیویوں کی ملازمت لگ گئی لیکن اس سے علاقے کے نوجوانوں کو معیاری تعلیم تو مل رہی ہے نا۔ لیکن بگٹی صاحب کے پاس اپنے دلائل تھے اور ہم نے بات آگے بڑھادی تھی۔

کوئٹہ انسٹی ٹیوٹ آف میڈیکل سائنسز کی افتتاحی تقریب سے خطاب میں آرمی چیف جنرل کیانی نے بتایا کہ فوج بلوچستان میں چوالیس سکول اور چھ کالج چلا رہی ہے جس میں تئیس ہزار طلبا و طالبات زیر تعلیم ہیں۔ میں نے ان کی تقریر اتنے قریب سے پہلی بار سنی اور ان کی آواز ’براڈ کاسٹنگ وائس‘ لگی۔

جس طرح انہوں نے بلوچستان میں ہر سال چار پانچ منصوبے فوج کی طرف سے شروع کرنے کا اعلان کیا اس سے تو لگا کہ ان کی بلوچستان کے بارے میں گہری منصوبہ بندی اور طویل مستقبل کی سرمایہ کاری کا ارادہ ہے۔

کوئٹہ انسٹی ٹیوٹ آف میڈیکل سائنسز ابھی زیر تعمیر ہے لیکن اس کی افتتاحی تقریب ایک اور عمارت میں منعقد ہوئی جہاں لیپ ٹاپ پر ایک بٹن دبا کر ویب سائٹ کا افتتاح کیا گیا۔ یہ بات مجھے ان سیاستدانوں جیسی لگی جو زیادہ سے زیادہ اپنی ناموں کی تختیاں لگوانے کے شوقین ہوتے ہیں۔ جنرل کیانی کے بارے میں کہا جاتا ہے کہ وہ کم گو اور خاموش طبع شخص ہیں لیکن ان کی تقریر سن کر ایسا لگا کہ وہ اس فن میں بھی کسی سیاستدان سے کم نہیں۔

میں نے اپنے بیس سالہ صحافتی دور میں کئی بار فوجی تقریبات دیکھی ہیں لیکن کوئٹہ میں جو چیز مجھے نئی محسوس ہوئی کہ دونوں تقریبات میں جنرل کیانی کا تعارف ایسی شد و مد سے کروایا گیا جیسے یہ کوئی فوجی نہیں بلکہ کسی بڑے پیر یا سعودی فرمان روا کی کوئی تقریب ہو جہاں متعلقہ شخص کا نام پورے اہتمام اور القابات سے لیا جاتا ہے۔ جیسا کہ ’نشانِ امتیاز ملٹری، ہلال امتیاز جنرل اشفاق پرویز کیانی چیف آف آرمی سٹاف۔‘ ایک تو بارہا ان کا نام لیا گیا اور جب بھی لیا تو آُسی تمہید کے ساتھ۔

__________________
سمندر نے سمندر ،دریا نے دریا جانا مجھے
جسکا جتنا ظرف تھا اتنا ہی پہچانا مجھے