بلوچستان میں حکومت سازی کیلئے صورتحال ابھی واضح نہیں
کوئٹہ (نمائندہ جنگ) بلوچستان میں حکومت سازی کے لئے سیاسی سرگرمیوں کا آغاز ہوگیا، سیاسی جماعتوں نے باہم رابطے شروع کردیئے ہیں جن میں آئندہ چند دنوں میں مزید تیزی آجائے گی۔ انتخابات جیتنے والی جماعتوں کے زیادہ تر رہنما اور کامیاب امیدوار ابھی تک اپنے آبائی حلقوں میں موجود ہیں، سابق وزیر اعلیٰ جام محمد یوسف کوئٹہ پہنچ گئے ہیں، اسمبلی میں نشستوں کی تعداد کے اعتبار سے مسلم لیگ (ق) کو اکثریت حاصل ہے جبکہ گزشتہ حکومت میں اس کی اتحادی جماعتوں جمعیت علماء اسلام کی 8/ اور بلوچستان نیشنل پارٹی (عوامی) کی 5/ نشستیں ہیں اس طرح سابق اتحادی جماعتوں کے پاس 51/ جنرل نشستوں میں سے 31/ نشستیں موجود ہیں، اسی اعتبار سے انہیں خواتین اور اقلیتوں کی مخصوص نشستیں بھی مل جائیں گی، اسی طرح حکومت سازی کے لئے 65/ رکنی اسمبلی میں انہیں واضح اکثریت حاصل ہوجائے گی تاہم اس مرتبہ پیپلزپارٹی بھی مضبوط پوزیشن میں ہے اس کے پاس اسمبلی میں 7/ نشستیں موجود ہیں اور وہ آزاد امیدواروں اور حکومتی اتحاد میں رخنہ ڈال کر بعض دوسری سیاسی جماعتوں کی مدد سے حکومت بنانے کی پوزیشن میں آسکتی ہے۔ وفاق میں پیپلزپارٹی کی حکومت بننے سے اس طرح کے جوڑ توڑ کے امکانات بڑھ گئے ہیں۔ ذرائع کے مطابق متعدد آزاد امیدواروں نے پارٹی سے رابطہ کرلیا ہے اگرچہ مسلم لیگ (ق) اور اس کی پرانی اتحادی جماعتوں کو بظاہر حکومت بنانے میں کوئی مشکل نہیں آنی چاہئے مگر حتمی فیصلہ مسلم لیگ (ق) کی جانب سے وزارت اعلیٰ کے امیدوار کا نام طے ہونے کے بعد ہی ہوسکے گا کیونکہ اس مرتبہ جام محمد یوسف کے علاوہ سابق وزیر اعلیٰ نواب ذوالفقار مگسی بھی اسمبلی میں پہنچ گئے ہیں اور وہ بھی وزارت اعلیٰ کے مضبوط امیدوار ہوسکتے ہیں اسی طرح پارٹی کے ایک اور رہنما سابق وفاقی وزیر سردار یار محمد رند بھی وزارت اعلیٰ کی دوڑ میں شامل ہوسکتے ہیں، ایسے میں پارٹی کی قیادت کے لئے وزارت کے امیدوار کا فیصلہ کرنا آسان نہ ہوگا۔ بلوچستان میں حکومت سازی کے لئے صورتحال و اضح ہونے میں ابھی چند دن انتظار کرنا پڑے گا کیونکہ وفاقی حکومت کے بلوچستان میں اثرات ضرور مرتب ہونگے اگر وفاق میں پیپلزپارٹی کی حکومت بلوچستان میں بھی ماضی کی طرح اپنی پارٹی کی حکومت قائم کرنے پر مصر ہوئی تو صوبے کی سیاست کا سارا نقشہ بدل سکتا ہے ایسی صورت میں چیف آف سراوان نواب محمد اسلم رئیسانی بلوچستان کے وزیر اعلیٰ بن سکتے ہیں۔

__________________