August 2, 2007

محکمہٴ صحت کے مقامی عہدے داروں کا کہنا ہے کہ صوبہٴ بلوچستان کے جھل مگسی ضلعے میں ہیضے کی وبا پھیل گئی ہے، جس کے نتیجے میں تحصیل گنداوا میں تین کم سن بچیاں ہلاک ہوگئیں، جب کہ سو سے زیادہ افراد کو مقامی ہسپتالوں میں داخل کر دیا گیا ہے۔

محکمہٴ صحت کے ضلعی سربراہ ڈاکٹر عاشق حسین نے بتایا کہ حالیہ سیلاب کے بعد ضلعے میں پینے کے پانی کی شدید کمی واقع ہو گئی ہے، جس سے وبائی امراض پھیل رہے ہیں۔ ان کے بقول متاثرہ افراد کی تعداد چار سو سے زیادہ ہو سکتی ہے۔

جھل مگسی کی تحصیل گنداوا میں جب مقامی صحافی حفیظ بلوچ سے صورتِ حال کے بارے میں پوچھا گیا تو انھوں نے بتایا کہ ابھی تک ڈاکٹروں کی کوئی موبائل ٹیم تشکیل نہیں دی گئی۔ ایک طرف تو ڈاکٹر اپنے ڈیوٹی سر انجام نہیں دے رہے تو دوسری جانب ہسپتالوں میں ادویات کابھی فقدان ہے۔

علاقے کے مقامی رہنما اسلم مگسی نے بتایا کہ اگر وبا کے فوری تدارک کے لیے اقدامات نہ کیے گئے تو علاقے میں بڑے پیمانے پر جانی نقصان کا اندیشہ ہے۔

یاد رہے کہ ایک ماہ قبل طوفانی بارشوں کے باعث صوبے کے اکثر اضلاع سیلاب سے شدید متاثر ہوئے تھے۔حکومتی دعویٰ ہے کہ متاثرین کی بحالی کا کام مکمل ہوگیا ہے، جب کہ اقوامِ متحدہ کا اصرار ہے کہ اب بھی ایسے علاقے موجود ہیں جہاں لوگوں کو امداد نہیں پہنچی۔

__________________