کراچی میں واقع بورڈ آف ریونیو کے ایک دفتر میں جمعرات کی صبح آگ لگ گئی ۔

اطلاعات کے مطابق فائر بریگیڈ کی آٹھ گاڑیوں نے آگ بجھانے کی کوشش شروع کی لیکن عمارت پرانی ہونے کی وجہ سے عمارت کے ایک حصے کے ٹکڑے گرنا شروع ہو گئے ہیں۔

یہ دفتر سندھ سیکریٹریٹ کے احاطے میں واقع ہے۔ بورڈ آف روینیو صوبے کی زمینوں کے مالکانہ حقوق کا ریکارڈ رکھنے کا کام کرتا ہے۔

اطلاعات کے مطابق عمارت سے صبح ساڑھے دس بجے دھواں اٹھنا شروع ہوا جس کے بعد فائر بریگیڈ کی گاڑیاں طلب کر لی گئی تھیں۔

جمعرات کو جس عمارت میں آگ لگی وہ عید میلاد النبی کی سرکاری تعطیل کی وجہ سے دفاتر بند تھے اور مرکزی داخلی دروازوں پر تالے پڑے ہونے کی وجہ سے فائر بریگیڈ بروقت احاطے کے اندر داخل نہیں ہوسکی۔

اطلاعات کے مطابق فائر بریگیڈ کا عملہ سندھ سیکریٹریٹ کی دیوار کا ایک حصہ توڑ کر اندر داخل ہوا۔تاہم بورڈآف ریونیو کے ملازمین کا کہنا ہے کہ آگ لگنے کے فورا بعد فائر بریگیڈ کو مطلع کر دیا گیا تھا لیکن آگ بجھانے والا عملہ ایک گھنٹے کی تاخیر سے پہنچا

واضح رہے کہ یہ عمارت پاکستان بننے سے قبل کی ہے اور یہ جگہ اولڈ بیرکس کہلاتی ہے اور پاکستان کی تخلیق سے پہلے سے لے کر آج تک کے سرکاری و نجی زمینوں اور پلاٹوں کے کاغذات کا ریکارڈ یہاں موجود ہوتا ہے۔

پاکستان میں نو منتخب حکومت پاکستان پیپلز پارٹی کے اراکین نے حالیہ پریس کانفرنسوں میں الزام عائد کیا تھا کہ کہ سرکاری زمینوں کی بندر بانٹ کی جا رہی ہے اور انہوں نے حکومت میں آنے کے بعد اس کی تحقیقات کا اعلان کیا تھا۔

یاد رہے کہ اس سے قبل پاکستان نیشنل شپنگ کارپوریشن کی عمارت کو دو مرتبہ آگ لگ چکی ہے جس میں کمپنی کا ریکارڈ خاکستر ہو گیا تھا لیکن اس کی وجہات کی رپورٹ ابھی تک سامنے نہیں آئی ہے۔