ملتان …مسلم لیگ) ق(کے سیکرٹری جنرل مشاہد حسین نے کہا ہے کہ مجھے فوجی بوٹوں کی نہیں بلکہ وزرا کے بھاگنے اور عوام کے جوتے حکمرانوں کو پڑنے کی آواز آ رہی ہے ۔یہ بات انہوں نے ملتان پریس کلب میں پریس کانفرنس کرتے ہوئے کہی ان کا کہنا تھا کہ حکمرانوں کی بے حسی اس سے زیادہ اور کیا ہو گی کہ جب سیلاب آ یا تو صدر پاکستان فرانس میں اپنی جائیداد کا فضائی نظارہ کر رہے تھے اور وزیراعظم جعلی میڈیکل کیمپوں کا دورہ کر رہے تھے۔ انہوں نے کہا کہ وطن کارڈ کی تقسیم میں حکمران سیاست کر رہے ہیں۔ حزب اختلاف کی جماعتوں سے تعلق رکھنے والے متاثرین سیلاب کے نام فہرستوں میں شامل نہیں کئے جا رہے ،حکمرانوں نے جہاں چاہا اپنی جائیدادیں اور فارم ہاؤسزز بچانے کیلئے کٹ لگا کر غریبوں کو ڈبو دیا ۔ان کا کہنا تھا کہ ڈھائی سال سے صوبائی حکومت نے زکوة و عشر کے فنڈ منجمد کر کے سستی روٹی اسکیم میں جھونک دئیے ۔مشاہد حسین سید کا کہنا تھا کہ امریکا نے بھی پاکستانی حکومت کوامداد میں دئیے جانے والے133 میں ڈالر کی کرپشن پر اپنے تحفظات کا اظہار کیا ہے۔ ایک سوال کے جواب میں ان کا کہنا تھا کہ قیوم جتوئی دنیا کے پہلے وزیر ہوں گے جنہوں نے کرپشن کو انسانی حقوق کا درجہ دیا۔ انہوں نے کہا کہ موجودہ حکومت نے بھی مشرف کی پالیسیوں کو جاری رکھا ہمارے دور میں صرف7 ڈرون حملے ہوئے جبکہ موجودہ دور میں155 ڈرون حملے کئے گئے جن کی اجازت صدر آصف علی زرداری نے2008 میں امریکن سی آئی اے کے چیف کو ملاقات کے دوران دی۔ انہوں نے کہا کہ کرپشن کے خاتمے کیلئے ضروری ہے کہ لیڈر صاف ستھرے ہوں اور ان پر کرپشن کے الزامات بھی نہ ہوں ۔

__________________
جاویداسد