بگرام ایئربیس پر قیدیوں کے ساتھ امریکی سلوک پر ریڈکراس کی تنقید
کابل(جنگ نیوز/وقائع نگار) عالمی تنظیم ریڈکراس نے افغانستان میں بگرام ایئربیس پر قید افراد کے ساتھ امریکی فوج کے سلوک پر کڑی تنقید کرتے ہوئے کہا ہے کہ بگرام کے فوجی اڈے پر چھ سو سے زائد افراد قید ہیں ان میں سے زیادہ تر کو یہ بھی نہیں معلوم کہ انہیں کیوں پکڑا گیا ہے اور وہ کب تک وہاں قید رہیں گے،دوسری جانب طالبان اور ریڈکراس کے درمیان افغانستان کے جنوبی علاقوں میں مسلح افراد کی کارروائیوں کے نتیجے میں متاثرہ افراد کو انسانی بنیادوں پر طبی امداد کی فراہمی کیلئے مذاکرات کامیاب ہوگئے ہیں۔تفصیلات کے مطابق آئی سی آر سی کے سربراہ جیکب کیلن برگر نے کابل میں نیوزکانفرنس کرتے ہوئے کہا ہے کہ بگرام کے امریکی فوجی اڈے میں موجود قیدیوں کو تمام حقوق دیے جائیں اور انہیں فوجی اڈے سے باہر عدالتوں میں اپنے دفاع کی اجازت بھی ملنی چاہیے۔دوسری جانب طالبان نے آئی سی آر سی کو جنوبی علاقوں میں مسلح کارروائیوں سے متاثرہ افراد کو طبی امداد کی فراہمی کی اجازت دیدی ہے۔ طالبان کے مطابق وہ آئی سی آر سی کی طبی سرگرمیوں کے بارے میں مثبت رائے رکھتے ہیں تاہم ریڈکراس نے طالبان پر واضح کردیا ہے کہ انہیں ان سرگرمیوں کے لئے سیکیورٹی فراہم کرنے کے سلسلے میں ٹھوس اقدامات کئے جائیں۔

__________________