ہندوستان کی ریاست کرناٹک کے شہر منگلور میں ایئر انڈیا کا ایک مسافر طیارہ زمین پر اترتے وقت حادثے کا شکار ہوگیا ہے جس میں ایک سو اٹھاون افراد کی ہلاکت کا خدشہ ہے۔

آٹھ مسافر معجزاتی طور پر بچ گئے تھے لیکن ایک نے ہسپتال میں زخموں کی تاب نہ لاکر دم توڑ دیا ہے۔

یہ بوئنگ سیون تھری سیون طیارہ ایئر انڈیا ایکسپریس کے بیڑے میں شامل تھا جو ایک بجٹ یا کیفائتی ایئر لائن ہے۔

طیارے کا ملبہ کافی بڑے علاقے میں پھیلا ہوا ہے۔

ایئر انڈیا کے اعلی اہلکاروں کے مطابق طیارہ پر عملے کے چھ ارکان سمیت ایک سو چھایسٹھ افراد سوار تھے۔ ان میں چارچھوٹے بچے شامل تھے۔

ایک سو سولہ لاشیں برآمد کر لی گئی ہیں جن میں سے بہت سی بری طرح جھلسی ہوئی ہیں۔

حادثہ صبح ساڑھے چھ بجے کے قریب پیش آیا جس کے بعد سے منگلور کا ہوائی اڈہ تمام پروازوں کے لیے بند کر دیا گیا ہے۔

حادثے کے بعد آس پاس کے دیہات سےلوگ جائے وقوعہ پہنچ گئے اور لوگوں کو بچانے کی کوشش کی۔

کرناٹک کے وزیر کے روزیا ہیلی کاپٹر کے ذریعہ منگلور جانے کی کوشش کر رہے تھے لیکن خراب موسم کی وجہ سے ان کے ہیلی کاپٹر کو راستے ہی میں اترنا پڑا۔ لیکن شہری ہوا بازی کے وفاقی وزیر پرفل پٹیل ممبئی سے منگلور پہنچ گئے ہیں جہاں انہوں نے جائے حادثہ کا معائنہ کیا ہے۔

حادثے میں بچ جانے والے ایک مسافر عمر فاروق کے مطابق طیارے کے لینڈ کرتے ہی اس کا ایک ٹائر پھٹ گیا۔ بتایا جاتا ہے کہ طیارہ رن وے سے آگے نکل کر درختوں سے ٹکرایا اور اس میں آگ لگ گئی۔ لیکن جب وہ رن سے نیچے کھائی میں گرا تو اس کے دو ٹکڑے ہوگئے اور کچھ مسافر باہر گر گئے۔

عمر فاروق نے کہا کہ ’میرا بچ جانا ایک معجزہ ہے۔ جب طیارہ دو ٹکڑوں میں ٹوٹا تو میں باہر کود گیا۔ لیکن میرے ہاتھ آگ سے جھلس گئے ہیں۔‘

ماہرین کے مطابق ٹائر پھٹنے کی خبر کی تصدیق انکوائری کے بعد ہی ہوگی لیکن عینی شاہدوں کے مطابق طیارے کے اترتے ہی ایک زور دار آواز آئی تھی جس کے بعد طیارہ کنٹرول سے باہر ہوگیا تھا۔ دیگر اطلاعات کےمطابق طیارہ ایک اینٹینا سے ٹکرا کر بے قابو ہوا۔

جہاز دبئی سے روانہ ہوکر منگلور پہنچا تھا۔ بعض اطلاعات کے مطابق زیادہ تر مسافر دبئی میں کام کرتے تھے اور چھٹیوں کے لیے گھر لوٹ رہے تھے۔

ایئر انڈیا کے ڈائریکٹر پرنسینل انوپ شریواستو کے مطابق طیارے کے کمانڈر سربیا نژاد برطانوی شہری تھے جو کم سے کم دو سال سے ایئر انڈیا سے وابستہ تھے۔

ایئر انڈیا کے مطابق دونوں پائلٹ بہت تجربہ کار تھے اور طیارہ کافی نیا تھا۔

شہری ہوابازی کے ادارے ڈی جی سی اے کے مطابق موسم صاف تھا پائلٹ نے کسی قسم کا کوئی ایمرجنسی سگنل نہیں بھیجا تھا۔

ڈی جی سی اے نے اعلی سطحی انکوائری شروع کر دی ہے جس کے بعد ہی حادثے کی وجہ معلوم ہو سکے گی۔

دو گھنٹے کی جدوجہد کے بعد آگ پر قابو پایا گیا جس کی وجہ سے امداد اور بچاؤ کے کام میں تاخیر ہوئی۔ لیکن ملبے سے کسی اور کے زندہ ملنے کا امکان زیادہ روشن نہیں ہے۔

یہ ہوائی اڈہ ایک پہاڑی علاقے میں واقع ہے اور ماہرین کے مطابق رن وے میں اوور شوٹ کرنے یا رن وے سے آگے نکل جانے کے بہت زیادہ امکان نہیں ہیں۔

ہندوستان میں یہ گزشتہ دس برسوں کا بدترین فضائی حادثہ ہے۔

سن دو ہزار میں ایک مسافر طیارہ پٹنہ میں حادثہ کا شکار ہوا تھا اور اس میں تقریباً پچاس افراد ہلاک ہوئے تھے۔ لیکن عام طور پر ہندوستان میں شہری ہوا بازی کا ریکارڈ کافی اچھا ہے۔

انیس سو چھیانوے میں ہریانہ کہ علاقے چرخی دادری میں دو غیر ملکی طیارے فضا میں ٹکرا گئے تھے جس میں تین سو اننچاس افراد ہلاک ہوگئے تھے۔

وزیر اعظم من موہن سنگھ نے ہلاک ہونے والوں کے لواحقین کے لیے دو لاکھ روپے کی فوری امداد کا اعلان کیا ہے۔
ـــــــــــــــــــــــــ ــــــ
بی بی سی اردو۔

__________________


http:// haroonazam.wordpress.com

ھارون اعظم کا بلاگ۔