کراچی( اسٹاف رپورٹر) پاکستا ن کرکٹ ٹیم بھارت کے دورے کے بعد وطن واپس پہنچ گئی، ہمارے کھلاڑی ہیرو کی حیثیت سے بھارت گئے تھے لیکن آئے تو زیرو ہو گئے۔ سیریز میں ناکامی سے دوچار ہونے والی کرکٹ ٹیم کے استقبال کو کوئی نہیں آیا، نہ وہ گہما گہمی ، نہ پرستاروں کا ہجوم کوئی دیکھنے میں نہیں آیاالبتہ پی سی بی کے چند آفیشلز وہاں ضرور موجود تھے ۔ عام طور پر ہیروز کا درجہ رکھنے والے کھلاڑی ہوائی اڈے پر موجود لوگوں کی زیادہ توجہ حاصل کرنے میں ناکام رہے، کرکٹرز کے آٹو گراف لینے والا تھا کوئی نہ تھا کسی نے ان کے ساتھ تصاویر بنوانے کی درخواست نہیں کی ۔ایئر پورٹ پر موجود خواتین نے بھی کھلاڑیوں کو لفٹ نہیں کرائی، یہ مایوس کن حالات دیکھ کر کھلاڑی حیران تھے ، لاہور سے کئی پروازیں حاجیوں کو حجاز مقدس لے کر جارہی ہیں ان کے عزیز واقارب بڑی تعداد میں پھولوں کے ہار لیے انہیں الوداع کہتے رہے لیکن کیمرے کی آنکھ ایسا کوئی منظر فلمبند نہ کرسکی کہ جس میں کسی نے کرکٹر کے گلے میں ہار ڈالا ہو۔ دہلی سے لاہور تک کے سفر کے دوران اور ایئر پورٹ پر صرف مصباح الحق ہی لوگوں کی توجہ کا مرکز بنے رہے، وہ اپنی فیملی کے ساتھ تھے، بھارت میں شاندار کارکردگی پر انہیں ہی پذیرائی مل سکی، جہاز میں بھی نہ صرف مسافروں نے ان کے ساتھ تصاویر بنوائیں اور آٹوگراف لیے بلکہ جہاز کا عملہ بھی انہیں ہی سب سے زیادہ اہمیت دے رہا تھا، اس سفر میں قومی کرکٹ ٹیم کے تین سابق کپتان انضمام الحق، رمیز راجہ ، عامر سہیل اور سابق فاسٹ بولر عاقب جاوید بھی تھے، حیرت انگیز طور پر لاہور پہنچنے پر ٹرمینل پر موجود لوگوں نے انضمام کو خوش آمدید کہا بعض افراد نے ان سے ٹیم میں واپسی کی بھی درخواست کی ۔لاہور آمد کے بعد قومی ٹیم کے اوپنر یاسر حمید اور آل راؤنڈر یاسر عرفات راولپنڈی چلے گئے، شعیب اختر بنگلور ٹیسٹ کے بعد دہلی روانہ ہوگئے جہاں سے وہ جمعہ کو ممبئی جائیں گے ،نائب کپتان یونس خان جمعرات کی صبح کراچی پہنچ گئے تھے جبکہ راؤ افتخار بدھ کی شب ہی پاکستان آگئے تھے، دونوں ایک دو روز میں فریضہ حج کی ادائیگی کیلیے روانہ ہوجائیں گے ، ان کے ساتھ محمد یوسف اور انضمام الحق بھی حج ادا کرنے جائیں گے ۔