بھارتی حکومت نے فیس بک اور گوگل جیسی سماجی رابطوں کی ویب سائٹس کی کمپنیوں سے کہا ہے کہ وہ سونیا گاندھی اور وزیرِ اعظم منموہن سنگھ جیسے بھارتی رہنماؤں اور مذہبی شخصیات کے بارے میں ہتک آمیز مواد اور تصویریں شائع نہ ہونے دیں۔

مواصلات اور انفارمیشن ٹیکنالوجی کے وزیر کپل سبل نے دلی میں نامہ نگاروں سے خطاب کرتے ہوئے کہا کہ حکومت سنسرشپ میں یقین نہیں رکھتی لیکن وہ ویب سائٹس پر ایسے مواد کی اجازت نہیں دے گی جن سے لوگوں کے جذبات مجروح ہوتے ہوں۔

مسٹر سبّل نے بتایا کہ حکومت نے ان ویب سائٹس کمپنیوں سے کہا ہے کہ وہ ہتک آمیز نوعیت کے مواد اور تصاویر شائع ہونے سے روکنے کا کوئی حل نکالیں۔

تاہم ان کمپنیوں کی انتظامیہ نے حکومت کو مطلع کیا ہے کہ یہ ویب سائٹس سرحدوں کی تابع نہیں ہیں اور یہ کہ یہ ویب سائٹس خیالات کے اظہار کا کھلا ذریعہ ہیں اس لیے وہ اس سلسلے میں حکومت کے ساتھ تعاون نہیں کر سکتیں۔

اس دوران فیس بک نے ایک بیان میں کہا ہے کہ اگر کسی مواد یا تصویر سے اس کے ضابطہ اخلاق کی خلاف ورزی ہوتی ہے تو وہ ضرور اس سلسلے میں قدم اٹھائے گی۔

بیان کے مطابق یہ سائٹ آزادیِ اظہار کا کھلا ذریعہ ہے۔’ہم ایسے کسی بھی مواد کو اپنی سائٹ سے ہٹا دیں گے جن سے ہمارے ضابطوں کی خلاف ورزی ہوتی ہو۔ جو نفرت پھیلاتے ہوں۔ دھمکی آمیز ہوں اور تشدد کو ہوا دیتے ہوں۔‘

اس سے قبل ٹوٹر اور فیس بک پر مسٹر سبّل کے اس بیان پر نکتہ چینیوں کے پیغامات بھرے ہوئے تھے جس میں انہوں نے ویب سائٹس سے کہا تھا کہ وہ اپنی سائٹس پر لوگوں کے بیانات اور خیالات شا‏ئع کرنے سے پہلے ان کا جائزہ لیں۔

مسٹر سبل نے کہا ہے کہ حکومت ایسے بیانات خیالات اورتصاویر شائع ہونے سے روکنے کے طریقے دریافت کرےگی جن سے لوگوں کے مذہبی جذبات مجروح ہوتے ہوں۔

ان کا کہنا تھا’حکومت یقینا ایسے رہنما اصول مرتب کرے گی جس سے یہ یقینی بنیا جا سکےگا کہ کوئی ہتک آمیز مواد کسی بھی سائٹ پر شائع نہ ہو سکے۔‘
بی بی سی
ملک میں انفارمیشن ٹیکنالوجی کے ماہرین نے مسٹر سبل کے اس بیان کو مضحکہ خیز قرار دیا ہے اور کہا ہے کہ یہ ممکن نہیں ہو سکے گا۔ سرچ انجن یاہو نے مسٹر سبل کے بیان پر کوئی ردعمل ظاہر نہیں کیا ہے۔

فیس بک، گوگل اور ٹوئٹر پر سینکڑوں خطوط شائع ہوئے ہیں جن میں مسٹر سبّل کے بیان کی سخت مذمت کی گئی ہے اورکہا گیا ہے کہ حکومت ویب سائٹس پر ’ایمرجنسی‘ نافذ کرنا چاہتی ہے۔

__________________
ناراضگی ظاہر کرنا دل میں برائی رکھنے سے بہتر ہے۔