درجہ بندی: (1 votes - 5.00 average)

ہندوستان کی ریاست جھارکھنڈ کی ایک عدالت نے ہندوؤں کے دیوتا رام اور ہنومان کو زمین کا تنازعہ حل کرنے میں مدد کے لیے نوٹس بھیجا ہے۔
فاسٹ ٹیرک عدالت کے جج سنیل کمار سنگھ نے اخبار میں ایک اشتہار کے ذریعے رام اور ہنومان کو ذاتی طور پر عداالت میں حاضر ہونے کا حکم دیا ہے۔

جج کا کہنا ہے کہ ان کی جانب سے رام اور ہنومان کے پتے پر بھیجےگئے مکتوب کا جواب نہیں مل سکا ہے اس لیے یہ نوٹس بھیج رہے ہیں۔ عدالت نے منگل کو یہ نوٹس بھیجا ہے۔

ہندوؤں کے درمیان رام اور ہنومان سب سے زيادہ مقبول دیوتا ہيں۔

واضح رہے کہ تقریبا ڈیڑھ ایکڑ زمین پر واقع دو مندر کے پجاری اور مقامی باشندوں کے درمیان تناز‏عہ بیس برس پرانا ہے۔ مقامی باشندوں کا کہنا ہے کہ یہ زمین رام اور ہنومان دیوتاؤں کی ہے جبکہ پجاری منموہن پاٹھک کا کہنا ہےکہ زمین کے مالک وہ ہیں۔
فریقین نے انیس سو ستاسی میں پہلی بار عدالت کا دروازہ کھٹکھٹایا تھا۔ چند سال قبل مقامی باشندوں کے حق میں یہ سارا معاملہ حل کرلیا گیا تھا۔ اس وقت منموہن پاٹھک نے فاسٹ ٹریک عدالت میں اس معاملے کو چیلنج کیا۔

جج سنیل سنگھ نے دیوتاؤں کو دو نوٹس بھیجے لیکن وہ واپس آگئے کیو ں کہ اس پر پتہ نامکمل تھا۔ اور اسی وجہ سے جج نے اس ضمن میں ایک اشتہار ایک اخبار میں شائع کیا ہے۔

جج کا کہنا ہے: ’ آپ (رام اور ہنومان ) عدالت میں حاضر ہونے میں ناکامیاب رہے ہيں جبکہ آپ کے پاس خادم اور رجسٹرڈ ڈاک سے نوٹس بھیجا گیا تھا۔ اب آپ کو ذاتی طور پر کورٹ میں حاضر ہونے کے لیے کہاجارہا ہے۔‘

دو ہندو دیوتاؤں کو اس لیے یہ نوٹس بھیجا جارہا ہے کیوں کہ مقامی باشندوں کا کہنا ہے کہ رام اور ہنومان مندر کے احاطے میں واقع زمین کے مالک ہيں۔