بیت اللحم( جنگ نیوز) سینکڑوں آباد کارصہیونیو ں نے بیت اللحم کے مغربی گاؤں ”خضر“کی تاریخی مساجد میں داخل ہوکر مسجد کو شہید کر دیا۔ آباد کاروں کے پاس آتشیں اسلحہ کے ساتھ آتش گیر مادہ بھی تھا جس سے انہوں نے مسجد کوآ گ لگادی، فلسطین کی تاریخی مسجد حمیدیہ کو آگ لگانے کے بعد وہ وہاں کھڑے رہے اور کسی مسلمان کو آگ بجھانے کے لیے نہیں آنے دیا ،پولیس اور فوج جنونی صہیونی گروہ کی حفاظت کرتی رہی، فلسطین میں اسلامی تحریک کے سربراہ رائد صلاح نے کہا یہ مجرمانہ اقدام ہے اور فلسطینی اتھارٹی کے محکمہ اوقاف کو درخواست دی گئی کہ وہ اسرائیلی ریاست سے تعلق رکھنے والے مجرموں کے خلاف مقدمہ درج کرائیں۔ مسجد آٹھ سو سال قبل صلاح الدین ایوبی کے دور میں تعمیرکی گئی تھی۔ اسرائیلی وزیر دفاع ایہودباراک نے کہا کہ مغربی کنارے میں اسرائیلی رکاوٹیں برقرار رہیں گی۔ انہوں نے فلسطینی اتھارٹی کی قیادت سے مطالبہ کیا ہے فلسطینی مزاحمت کو کچلنے کے لئے تعاون کریں۔ شمالی غزہ پٹی میں اسرائیلی تال الراس چیک پوسٹ کا دورہ کرتے ہوئے باراک نے کہا مغربی کنارے کے بارے میں ہم پالیسی تبدیل نہیں کرسکتے ۔

__________________